सागको राष्ट्रिय टिम तयारी बुधबारबाट

काठमाडौं । १३ औं दक्षिण एसियाली खेलकुद प्रतियोगिता सागको राष्ट्रिय टिम तयारी बुधबारबाट सुरु हुने भएको छ । जेठको पहिलो साता भित्र तयारी सुरु गर्ने भनिएपनि अन्तिम समयमा आएर जेठको १५ गतेबाट राष्ट्रिय टिमको तयारी सुरु गर्न लागिएको हो ।

सागको प्राविधिक समितिका सचिव रिम रानाभाटका अनुसार सुरुवाती चरणमा सात खेलका खेलाडीलाई प्रारम्भिक रुपमा बन्द प्रशिक्षणमा राखिने खेलपाटीलाई बताए ।
बुधबारबाट सुरु हुने राष्ट्रिय टिमको तयारीमा प्याराग्लाईडिङ, सुटिङ, जुडो, भारत्तोलन, आर्चरी, टेबल टेनिस र स्क्वासका खेलाडीलाई समावेश गरिनेछ ।

उपलब्ध बजेटका आधारमा ७ खेलको प्रशिक्षण सुरु गरिएको रानाभाटले उल्लेख गरे । पहिलो चरणमा असार मसान्तसम्म प्रशिक्षण सञ्चालन गरिनेछ र अन्य खेलको प्रशिक्षणलाई समेत संगै अघि बढाईनेछ ।

राष्ट्रिय खेलकुद परिषद राखेपले आठौं राष्ट्रिय खेलकुदमा स्वर्ण र रजत जितेका खेलाडीलाई तयारी प्रशिक्षणमा बोलाएको छ ।

राखेपले आगामी मंसिरमा सबै खेल समावेश गर्दै राखेप च्याम्पियनसिप आयोजना गर्ने तयारी गरेको छ । सोही प्रतियोगितामा राष्ट्रिय टिमको तयारीमा रहेका खेलाडी र व्यक्तिगत रुपमा अभ्यासरत खेलाडीबीच प्रतिस्पर्धा हुनेछ । राखेप च्याम्पियनसिपमा प्रथम हुने खेलाडीलाई १३ औ सागमा नेपालको प्रतिनिधित्व गराउने सरकारको तयारी छ ।

गत बैशाख २६ गते बसेको सागको तयारी तथा व्यवस्थापन मुल समारोह समितिको बैठकले राष्ट्रिय टिमको तयारी जेठको पहिलो साता गर्ने निर्णय गरेको थियो । तर सरकारले बजेट अभावको कारण देखाउँदै खेलाडीको बन्द प्रशिक्षण सुरु गर्न सकेको थिएन ।

आगामी डिसेम्बरमा नेपालमा आयोजना हुने तय भएको सागमा २७ खेल समावेश छन् । नेपालले आयोजकको हैसियतमा प्याराग्लाईडिङ र क्रिकेटलाई समावेश गर्दै सागमा २७ खेल राख्ने निर्णय गराएको थियो ।

सागको बजेट बन्न सकेन 

बैशाखको अन्तिम साता खेलकुद मन्त्री जगतबहादुर विश्वकर्माको अध्यक्षतामा बसेको मुल आयोजक तयारी समितिको बैठकले प्रतियोगिता सञ्चालनमा लाग्ने खर्चको विवरण तयार गर्न राखेप उपाध्यक्ष पिताम्बर तिम्सिनाको संयोजकत्वमा बजेट कार्यदल गठन गरेको थियो । एक हप्ताको समयसिमा दिएर कार्यदल गठन गरेपनि झण्डै दुई हप्ता वितिसक्दा समेत सागको आवश्यक बजेट निर्धारण हुन सकेको छैन ।

साग तयारीकालागि मन्त्रालयले विभिन्न समिति गठन गरेको थियो ।

प्राविधिक समितिमा गंगाबहादुर थापा, सुरक्षा समितिमा नेपाल प्रहारीका महानिरिक्षक सर्वेन्द्र खनाल, स्वयमसेवकमा बिनोद श्रेष्ठ, यातायातमा शिव कोइराला, आवासमा तेज गुरुङ र खेल स्थल व्यवस्थापनमा टासी घरेललाई जिम्मेवारी दिएको थियो ।

तर गठन गरिएका समितिले आवश्यक बजेटको खाका पेश गरेका छैनन् । पटक पटक पत्राचार गर्दा समेत समितिले सम्बन्धित क्षेत्रमा लाग्ने खर्चको बजेट पेश नगरेकाे राखेपले जनाएकाे छ । 

सरकारले प्रतियोगिता सञ्चालनका लागि करिब ४ अर्ब रुपैयाँ खर्च हुने अनुमान गरेको छ । अनुमानित बजेटमा सवाँ अर्व रुपैयाँ खेल सामाग्री खरिदमा खर्च हुनेछ ।