जोमसोम । दोस्रो संस्करण प्रधानसेनापति हाई अल्टिच्यूड ट्राई एडभेन्चर म्याराथन प्रतियोगिता अन्तर्गत पुरुषको उपाधि त्रिभुवन आर्मी क्लबको 'ए' टोलीले जितेको छ ।
मुस्ताङको जोमसोममा सोमबार भएको प्रतियोगितामा एपीएफ टोलीलाई पछि पार्दै आर्मीको 'ए' टोलीले उपाधि जितेको हो ।
वसन्त थारु र हिमाल टमटा रहेको आर्मीको 'ए' टिमले निर्धारित दुरी १ घण्टा १९ मिनेट ४२ सेकेण्डमा पुरा गरे । उपाधिसँगै आर्मीको 'ए' टोलीले नगद ५० हजार प्राप्त गरेको छ ।
लक्ष्मण मल्ल र किरण मल्ल रहेको एपीएफ टोलीले निर्धारित दुरी १ घण्टा १९ मिनेट ५२ सेकेण्डमा पुरा गर्दै दोस्रो स्थान हासिल गर्यो । एपीएफ टोलीले नगद ३० हजार प्राप्त गर्यो ।
निर्धारित दुरी १ घण्टा २४ मिनेट २९ सेकेण्डको समयसहित प्रताप थापा र दिपक सिंह भण्डारी रहेको आर्मीको 'बी' टोलीले तेस्रो हुँदै २० हजार प्राप्त गरे ।
महिलातर्फको उपाधि एपीएफले जित्यो । सोनी थापा र निर्जला ताम्राकार रहेको एपीएफले निर्धारित समय १ घण्टा ४५ मिनेट ५४ सेकेण्डमा पुरा गर्यो ।
यस्तै हुमि बुढा मगर र खनाल रहेको हिमालयन गोट्सले निर्धारित दुरी १ घण्टा ५२ मिनेट ३० सेकेण्डमा पुर्दै दोस्रो र लक्ष्मी थापा मगर र केशरी थापा मगर रहेको आर्मीले निर्धारित दुरी १ घण्टा ५३ मिनेट १९ सेकेण्डमा पुरा गर्दै तेस्रो स्थान हासिल गरे ।
साहसिक खेलकुद अन्तर्गत रक क्लाईम्बिङ, दौड र साइक्लिङ समावेश ट्राई एडभेन्चर प्रतियोगितामा सहभागी सवै टिमका खेलाडीले १ सय मिटरको रक क्लाईम्बिङ, ४.७५ किमीको दौड र १५.३५ किमी साइक्लिङ गरेका थिए ।
ब्राजिल तथा युरोपियन राष्ट्रमा लोकप्रिय रहेको ट्राई एडभेन्चर नेपालमा दोस्रो पटक नेपाली सेनाले आयोजना गरेको हो ।
तस्विर : राजिब चन्द
