पुलिस कोहलपुर गोल्डकपको उपाधिनजिक

बाँके। विभागीय टिम नेपाल पुलिस क्लबमा चौथो कोहलपुर गोल्डकपको फाइनलमा प्रवेश गरेको छ।

कोहलपुर–२ स्थित प्रस्तावित कोहलपुर फुटबल रंगशालामा बिहीबार भएको दोस्रो सेमिफाइनल खेलमा रोयल फुटबल क्लब कर्णाली प्रदेशलाई ५–३ ले पराजित गर्दै पुलिस उपाधिनजिक पुगेको हो।

निकै रोमाञ्चक खेलमा निर्धारित समयमा कुनै पनि गोल हुन सकेन। जारी संस्करणमा पेनाल्टीमार्फत नतिजा निस्किएको यो नै पहिलो खेल हो। अब पुलिसले आयोजक कोहलपुर रेसिङ सहारा क्लब कोहलपुरसँग खेल्नेछ।

पेनाल्टीमा पुलिसका कप्तान राम बगाले, अनिल टमाटा,सञ्जीव लामा, हेमन्त श्रेष्ठ र सुजन मगरले गोल गरे। कर्णालीका करण शाही, दिवस बिसी र विक्रम अलीले गोल गर्दा कप्तान सुदन विश्वकर्माले गोल गर्न सकेनन्।

बुधबार भएको पहिलो सेमिफाइनलमा लालीगुराँस एसोसिएसन क्लब पोखरालाई २–१ ले पराजित गर्दै रेसिङ फाइनलमा प्रवेश गरेको थियो। फाइनलमा खेल वैशाख २६ गते हुनेछ। प्रतियोगितामा आठ टिम सहभागी थिए।

प्रतियोगिताको उपाधि जित्ने टिमले आठ लाख रुपैयाँ प्राप्त गर्नेछन्। उपविजेतालाई चार लाख रुपैयाँ प्रदान गरिने आयोजकले जनाएको छ। प्रतियोगिताका सर्वश्रेष्ठ खेलाडीले ५१ हजार रुपैयाँ प्राप्त गर्नेछन्।