काठमाडौं । १३ औ दक्षिण एसियाली खेलकुद प्रतियोगिता सागको तयारी समितिको बैठक कोरम नपुगेर स्थगित हुने अवस्था सिर्जना भएको छ ।
युवा तथा खेलुकद मन्त्री जगत विश्वकर्मा संयोजक रहेको तयारी तथा व्यवस्थापन मुल समारोह समितिको मंगलबार अपरान्ह बस्ने बैठक कोरमै नपुगी स्थगित भयो ।
खेलकुद मन्त्री विश्वकर्माले मंगलबार ३ बजे तयारी समितिको बैठक आह्वान गरेका थिए । तर संसदमा नीति तथा कार्यक्रममाथि छलफल चलेकाले ४ बजेमात्र बैठक बस्न तयारी भयो । तर बैठकमा करिब १० जनामात्र सदस्य उपस्थित रहे ।
कोरम नपुग्ने अवस्था सिर्जना भएपछि बैठक अघि बढ्न भने सकेन ।
सागको प्रतियोगिता आयोजनाका लागि खेलकुद मन्त्री संयोजकत्वको तयारी तथा व्यस्थापन मुल समारोह समिति छ ।
समितिमा विभिन्न मन्त्रालयका सचिव, ओलम्पिक कमिटि, राखेप, विभिन्न सुरक्षा निकायका प्रतिनिधि सहित करिब ३६ जना सदस्य रहने व्यवस्था छ ।
तर प्रतियोगिता आयोजनालाई लिएर समिति सदस्यले वेवास्ता गर्दा बैठकमा कोरमनै नपुग्ने अवस्था सिर्जना भएको हो ।
आयोजना बारे मन्त्रालयले विश्वस्त गराउन नसक्दाँ र सुचनाको व्यवस्थापकीय कमजोरीका कारण कोरम नपुग्ने अवस्था सिर्जना भएको समितिका एक सदस्यले खेलपाटीलाई बताए ।
सरकारले सन् २०१९ भित्र १३ औ दक्षिण एसियाली खेलकुद प्रतियोगिता आयोजना गर्ने प्रतिबद्वता जनाएको छ । सोही प्रतियोगितालाई उच्च प्राथमिकतामा राख्दै सरकारले नीति तथा कार्यक्रममा समेत साग खेललाई महत्व दिएको छ ।
तर घरेलु खेलकुदको सर्वोच्च निकाय युवा तथा खेलकुद मन्त्रालय गम्भिर नबन्दा तयारी समितिको बैठकमा कोरमनै नपुग्ने अवस्था सिर्जना भएको हो ।
बुधबार एक कार्यक्रममा मन्त्री विश्वकर्माले समेत व्यवस्थापनमा समस्या हुदाँ बैठकको कोरम पुग्न नसकेको बताए ।
सन् २०१८ मा सम्पन्न गरिसक्नुपर्ने प्रतियोगिता नेपालले पुर्वाधार निर्माणको कारण देखाउँदै अन्तिम पटक सन् २०१९ को डिसेम्बरमा आयोजना गर्ने प्रतिबद्वता जनाएको थियो ।
दक्षिण एसियाली ओलम्पिक काउन्सिलको बैठकले समेत प्रतियोगिता डिसेम्बर १ देखि १० सम्म काठमाडौंमा आयोजना गर्ने निर्णय गरेको छ ।
