कर्णाली स्पोर्ट्स क्लबलाई रुट्सको सहयोग 

काठमाडौं । नेपालमा चर्चित ब्राण्डको खेलकुद पोशाक र खेल सामग्रीको बिक्रि वितरण गर्दै आईरहेको रुट्स फेसन प्रालि (रुबेल्स स्टोर) ले कर्णाली स्पोर्ट्स क्लबलाई आर्थिक सहयोग गरेको छ ।

रुट्स फेसनले नेपालको कीर्तिमानी धावक हरि बहादुर रोकायाले संचालन गरेको क्लब कर्णाली स्पोर्ट्सलाई १ लाख ५० हजार नगद आर्थिक सहयोग गरेको हो । रुट्स फेसनका निर्देशक राजीव श्रेष्ठले मंगलबार क्लबका अध्यक्ष रोकायालाई चेक हस्तान्तरण गरे ।

कार्यक्रममा बोल्दै रुट्स निर्देशक राजीव श्रेष्ठले सामाजिक उत्तरदायीत्व अन्तर्गत कम्पनिले कर्णाली स्पोर्ट्सलाई सहयोग गरेको बताए  ।

यस्तै रुट्स फेसनले 'शु एक्सचेन्ज' कार्यकम अन्तर्गत आएको जुत्ताहरु कर्णाली स्पोर्ट्सलाई प्रदान गर्ने जनाएको छ ।

एक महिना चल्ने उक्त 'शु एक्सचेन्ज' कार्यकम बुधबारबाट सुरु हुनेछ । उक्त कार्यक्रममा ग्राहकले पुरानो जुत्ता ल्याएर चर्चित ब्राण्डका नयाँ जुत्ताहरु लैजान पाउने छन् । उक्त जुत्तामा २ हजार सम्मको छुट पाउने रुट्सले जनाएको छ  ।