काठमाडौं । अखिल नेपाल फुटबल संघ एन्फाका अध्यक्ष कर्माछिरिङ शेर्पा र कतार फुटबल संघका अध्यक्ष हमाम विन खालिफा विन महमेद अल थानीबीच आज (सोमबार) भेटवार्ता भएको छ ।
दुई दिने नेपाल भ्रमणमा आएका कतारका फुटबल संघका अध्यक्ष थानी र एन्फा अध्यक्ष शेर्पाबीच काठमाडौंको एक होटलमा भेटवार्ता भएको हो ।
एएफसीको नयाँ नेतृत्वकालागि निर्वाचनको मिति नजिकिदै गर्दा थानी विदेश भ्रमणमा निस्किएका हुन् । उनी श्रीलंकाको भ्रमण सकेर नेपाल पसेका हुन् ।
भेटको क्रममा नेपाल र कतार फुटबल संघबीच यसअघि भएको सम्झौता कार्यान्वयनको बिषयमा छलफल भएको थियो ।
दुई अध्यक्ष कार्यतालिका बनाएर दुई देशबीच भएको सहमती कार्यान्वयन गर्ने बिषयमा सहमत भएका छन् ।
सहमती कार्यान्वयनको कार्यतालिका बनाउन एन्फाका दुई प्रतिनिधि चाँडै कतार जाने सहमती समेत बनेको छ ।
भेटमा सहभागि एक एन्फा पदाधिकारीका अनुसार संघका महासचिव र एक उपाध्यक्ष सहमती कार्यान्वयनको कार्यतालिका बनाउन चाँडै कतार जाने छन् ।
यसअघि नेपाल र कतारबीच फुटबल विकासका लागि पाँच बर्षको सम्झौता भएको थियो ।
दुई देशबीच फुटबल व्यवस्थापन, प्राविधिक पक्ष, प्रशिक्षक, रेफ्री र खेलाडी आदानप्रदान सहितका १७ बुँदामा सहमती भएको थियो ।
‘दुई देशका फुटबल संघबीच भएको सम्झौता कार्यान्वयनको बिषयमा छलफल भयो ।’ भेटमा सहभागि एक पदाधिकारीले भने, ‘कार्यतालिका बनाएर सहमतीलाई कार्यान्वयन गर्न दुवै अध्यक्षबीच सहमती भएको छ ।’
भेटवार्तामा एएफसीको आसन्न निर्वाचनको बिषयमा कुनै छलफल नभएको बताईएको छ ।
एएफसीको नयाँ निर्वाचनको मिति नजिकिदै गर्दा थानीको नेपाल भ्रमणलाई अर्थपुर्ण रुपमा हेरिएको छ ।
एएफसीको नयाँ नेतृत्वको निर्वाचनमा कतारका उपाध्यक्ष साउद ए अजिज एम ए अल मोहननादीले उम्मेद्वारी दिएका छन् । उनीसंगै वर्तमान अध्यक्ष शेख सलमान विन ईब्राहिम अल ईब्राहिम र युएईका मोहमद काफलन मटर सईद अलरोमिथ चुनावी प्रतिस्पर्धामा छन् ।
यसअघि एएफसीमा अध्यक्ष तथा बहराईनमा अध्यक्ष शेख सलमानले केही महिना अघि नेपालको भ्रमण गरेका थिए ।
नयाँ नेतृत्वको लागि एएफसीको साधारण सभा मलेसियाको क्वलालाम्पुरमा अप्रिल ६ मा बस्दैछ ।
कतारी अध्यक्ष थानी सहितको भ्रमण टोली आजै साँझ स्वदेश फर्कनेछ ।
