कृष्ण बस्नेतलाई प्रधानसेनापति खुला म्याराथनको उपाधि

काठमाडौं । प्रधानसेनापति खुला म्याराथनको उपाधि आर्मीका कृष्ण बस्नेतले जितेका छन् । आफ्नै विभागका राजन खत्री र नवराज साउदलाई पछाडी पार्दै कृण्णले उपाधि जितेका हुन् ।

महाशविरात्रीको तथा सेना दिवसका अवसरमा नेपाली सेनाको सैनिक शारीरिक तालिम तथा खेलकुद केन्द्रले आयोजना गरेको दौडमा सेनाकै खेलाडीको वर्चस्व रह्यो ।

म्याराथनमा पहिलो भएका कृष्णले निर्धारित दुरी २ घण्टा २० मिनेट ५१ सेकेन्डमा पुरा गरे । दोस्रो भएका राजनले २ घण्टा २८ मिनेट लगाए । तेस्रो भएका नवराजले २ घण्टा २५ मिनेट २९ सेकेन्डको समयमा निर्धारित दुरी पार गरे ।

उपाधिसंगै कृष्णले एक लाख २५ हजार सहित एक मोटरसाईकल प्राप्त गरे । दोस्रो भएका राजनले ६५ हजार र तेस्रो भएका नवराजले ३५ हजार प्राप्त गरे ।

हाफ म्याराथनतर्फ पुरुषतर्फ आर्मीकै कल्याण बाँनियाँ पहिलो भए । उनले निर्धारित दुरी १ घण्टा ६ मिनेट ३१ सेकेन्डमा पुरा गरे । दोस्रो भएका गजेन्द्र राईले १ घण्टा ६ मिनेट ३८ सेकेन्डको समय लगाए । तेस्रो भएका टिकाराज कट्वालले १ घण्टा ७ मिनेट २३ सेकेन्डको समयमा दुरी पार गरे ।

महिलतर्फ आर्मीकी विश्वरुपमा बुढा पहिलो भईन् । उनले निर्धारित दुरी १ घण्टा १७ मिनेट २० सेकेन्डमा पार गरिन । दोस्रो भएकी एपीएफकी बिन्द्रा देसारले निर्धारित दुरी पार गर्न १ घण्टा २६ मिनेट १२ सेकेन्डको समय लगाईन् । तेस्रो भएकी चन्द्रा रावतले निर्धारित दुरी १ घण्टा २१ मिनेट ३२ सेकेन्डरमा पार गरिन् ।

दुवै स्पर्धाका विजेताले ५० हजार, दोस्रो हुनेले ३५ हजार र तेस्रो हुनेले २५ हजार रुपैयाँ प्राप्त गरेका थिए ।