योहान कालिन पुन एक पटक नेपाल फर्किएका छन् । पाँच बर्षपछि नेपाली फुटबलमा फर्कदा उनको परिचयमात्र बदलिएको छैन, हैसियत समेत फेरिएको छ ।
पाँच बर्ष अगाडी अर्थात २०७० सालमा ए डिभिजन क्लब मछिन्द्रलाई प्रशिक्षण दिन उनी नेपाल आएका थिए । फेरी एक पटक उनी राष्ट्रिय फुटबल टिमको मुख्य प्रशिक्षकको नयाँ हैसियतमा आज (बिहिबार) नेपाल छिरेका छन् ।
त्रिभुवन अन्तराष्ट्रिय विमानस्थलमा अपरान्हमा ओर्लिने बित्तिकै उनी केही पत्रकारबाट घेरिन पुगे । पत्रकारले उनका योजना र नेपाली भविष्यको बिषयमा केही प्रश्न तेर्साए । नेपाली फुटबलको नतिजा र भविष्य बदल्ने अपेक्षा सहित एन्फाले मुख्य प्रशिक्षकको जिम्मेवारी दिएका कालिन के उद्वेश्यमा सफल होलान् ?
खेलपाटीकर्मी विश्वास थापाले तयार पारेको अन्तरवार्ताको सम्पादित अंश :
तपाइले सुरुमा ए डिभिजन क्लब मछिन्द्रसंग आबद्ध भएर काम गरिसक्नु भएको छ, अब नेपाली फुटबललाई कसरी अगाडी लैजानुहुन्छ ?
मछिन्द्रसंग आबद्ध हुँदा तल्लो तहबाट प्रशिक्षण गराउथे । खेलाडी समेत अनुशासित भएर सिक्न निकै उत्साहीत रहन्थे । आउने बर्ष खेलाडी फुटबलले कठिन चनौतीको सामना गर्नुपर्नेछ । घरेलु लिग सुरु भएको छ । मेरो अनुभवले नेपाली खेलाडी निकै मेहनती छन् । म विश्वास गर्छु, नेपाली फुटबलमा मैले केही गर्नेछु ।
पछिल्लो समय नेपाली फुटबललाई कसरी नियाल्नु भएको छ ?
मैले इन्टरनेटबाट नेपाली फुटबललाई फलो गरिरहेको थिए ।
सुरुवातीमा तपाईबाट कस्तो अपेक्षा राख्न सक्छौ ?
सुरुवाती समयमा ठुलो नतिजा आउन गाह्रो छ । तर जुन गल्ती हामीले गर्दै आएका थियौ, त्यसलाई सुधार गर्न कदम अघि बढाउँछौ । सुरुमा सबै खेलाडीसंग चिनजान गर्नेछु । उनीहरुको खेल्ने शैली र क्षमतलाई हेर्नेछु । सोही अनुसार योजना बन्नेछ ।
पछिल्लो समय नेपाली क्रिकेटले अन्तराष्ट्रिय स्तरमा ठुलो सफलता प्राप्त गरेको छ । फुटबलबाट के अपेक्षा गर्न सकिन्छ ?
मलाई थाहा छ, नेपाली खेलाडी प्रतिभाशाली छन् । तर हामीले सही नेतृत्व गर्न सक्ने संस्था पायौ भने हामीले निकै राम्रो गर्न सक्छौ । म पाँच बर्षपछि नेपाली फुटबलमा फर्किएको छु । म सुरुवाती तहबाटै काम गर्नेछु ।
