नेपाललाई बहराइनको सामान्य लक्ष्य

काठमाडौं। कप्तान सन्दीप लामिछानेको घातक बलिङसँगै नेपालले एसिसी प्रिमियर कपको पहिलो खेलमा ८८ रनको सामान्य लक्ष्य पाएको छ।

मलेसियाको बाङ्गीस्थित वाईएसडी–यूकेएम ओभलको मैदानमा टस हारेर पहिला ब्याटिङको निम्तो पाएको बहराइन ३६.२ ओभरमा ८७ रनमै अलआउट भएको हो।

बहराइनका फियाज अहमदले सर्वाधिक १५ रन बनाए। उनले १५ बलमा २ चौका र १ छक्का प्रहार गरे। मुहम्मद वासिमले १३ रन बनाए भने अली दाउदले २८ बलमा १० रन जोडे। अब्दुल माजिद अब्बासी ५८ बलमा ८ रन बनाएर नटआउट रहे।

नेपालका सन्दीपले १० ओभरमा १४ रनसहित ४ मेडन खर्चेर ५ विकेट लिए। ललितनारायण राजवंशीले ६.२ ओभरमा २० रन खर्चेर ३ विकेट लिए भने करण केसीले २ विकेट लिए।