बार्सिलोना जाने पक्का भए रोड्री

काठमाडौं। स्पेनका विश्वकप विजेता कप्तान रोड्री म्यानचेस्टर सिटी छाडेर आफ्नो देशको क्लब बार्सिलोनामा फर्किने तयारीमा रहेका छन्।

म्यानचेस्टर सिटी र बार्सिलोनाबीच रोड्रीको स्थानान्तरणका लागि ७६.५ मिलियन युरो (करिब ८८.५ मिलियन अमेरिकी डलर) मा सहमति भएको कारोबारबारे जानकार एसोसिएटेड प्रेस (एपी) ले जनाएको छ।

सिटी र बार्सिलोनाले भने हालसम्म स्थानान्तरणबारे आधिकारिक प्रतिक्रिया दिएका छैनन्। ३० वर्षीय रोड्री सन् २०१९ मा एट्लेटिको मड्रिडबाट सिटी पुगेका थिए। उनले सन् २०२३ मा इन्टर मिलानविरुद्धको च्याम्पियन्स लिग फाइनलमा निर्णायक गोल गर्दै सिटीलाई उपाधि दिलाउन महत्त्वपूर्ण भूमिका खेलेका थिए।

त्यसको अर्को वर्ष उनले बालोन डी’ओर जित्दै विश्वकै उत्कृष्ट खेलाडीको उपाधि हासिल गरेका थिए। त्यतिबेला उनी स्पेनको युरोपियन च्याम्पियनसिप विजेता टोलीका पनि महत्वपूर्ण सदस्य थिए।

गत महिना सम्पन्न विश्वकपमा स्पेनलाई उपाधि दिलाउने क्रममा रोड्री टोलीका महत्वपूर्ण खेलाडी थिए र उनले प्रतियोगिताको उत्कृष्ट खेलाडीका रूपमा ‘गोल्डेन बल’ समेत जितेका थिए।

रोड्रीको सिटीसँगको सम्झौतामा अब एक वर्ष मात्र बाँकी थियो। उनको सम्भावित प्रस्थानले सिटीको मिडफिल्ड अझ कमजोर हुने देखिएको छ। यसअघि बर्नार्डो सिल्भाले पनि क्लब छाडेर यसै समरमा रियल मड्रिडमा आबद्ध भइसकेका छन्।

विश्वकपपछि गरिएको सामान्य ढाडको शल्यक्रियाबाट निको भइरहेका कारण रोड्रीले आइतबार आर्सनलविरुद्ध भएको कम्युनिटी शिल्डको खेलमा पनि सहभागिता जनाएनन्। उक्त खेलमा सिटी आर्सनलसँग ३–० ले पराजित भएको थियो।