जर्मनीलाई हराएपछि पाराग्वेमा राष्ट्रिय बिदा

विश्वकप छनोट चरणमा ब्राजिल र अर्जेन्टिनाजस्ता बलिया टोलीलाई हराएको आत्मविश्वास बोकेर पाराग्वे जर्मनीविरुद्ध अन्तिम ३२ को खेलमा उत्रिएको थियो।

‘अन्डरडग’को रूपमा मैदानमा प्रवेश गरे पनि टोलीका प्रशिक्षकले जितप्रति पूरा विश्वास व्यक्त गरेका थिए। उनका खेलाडीले पनि त्यो विश्वासलाई वास्तविकतामा परिणत गर्दै निर्धारित समयको १–१ बराबरीपछि पेनाल्टी सुटआउटमा ४–३ ले चार पटकको विश्व च्याम्पियन जर्मनीलाई पराजित गर्दै प्रतियोगिताबाट बाहिरिएका छन्।

यो ऐतिहासिक जितपछि पाराग्वेका राष्ट्रपति सान्टियागो पेनाले मंगलबार देशभर राष्ट्रिय सार्वजनिक बिदा घोषणा गरेका छन्। उनले विज्ञप्तिमार्फत जर्मनीविरुद्ध टोलीले हासिल गरेको ऐतिहासिक सफलताको सम्मानस्वरूप जुन ३० लाई राष्ट्रिय बिदा घोषणा गरिएको बताएका छन्।

जर्मनीमाथिको ऐतिहासिक जितका नायक बनेका गोलरक्षक ओर्लान्डो गिलले खेलअघि विपक्षी टोलीका स्टार खेलाडीबाट आफू प्रभावित भएको स्वीकार गरे। तर‚ यो जितले पाराग्वेले ठूला उपलब्धि हासिल गर्न सक्ने विश्वास अझ बलियो बनाएको उनको भनाइ छ।

गिलले भने,‘यो नतिजाले कुनै पनि टोलीबारे धेरै छिटो निष्कर्ष निकाल्नु हुँदैन भन्ने देखाएको छ। यसले पाराग्वे ठूलो उपलब्धि हासिल गर्न सक्षम छ भन्ने प्रमाणित गरेको छ। यो अवसर आउने निश्चित थियो, हामीले सही समयको प्रतीक्षा गरेका थियौं।’

पेनाल्टी सुटआउटमा गिल नै पाराग्वेका मुख्य नायक बने। उनले जर्मनीको पहिलो पेनाल्टी प्रहारकर्ता काई हाभर्ट्जको प्रहार दायाँ हातले रोके। त्यसपछि पाराग्वेले आफ्ना पहिलो तीन पेनाल्टी सफलतापूर्वक गोल गर्दै ३–२ को अग्रता बनायो।

गिलले पछि निक भोल्टेमाडेको पेनाल्टी पनि बचाउँदै टोलीलाई जितको नजिक पुर्‍याए। त्यसपछि पाराग्वेलाई अन्तिम दुईमध्ये कुनै एक पेनाल्टी गोल गरे जित सुनिश्चित हुने अवस्था बनेको थियो।

खेलभर जर्मनीले पाराग्वेको तुलनामा दोब्बरभन्दा बढी समय बल आफ्नो नियन्त्रणमा राख्यो। जर्मनीले गोलतर्फ २१ प्रहार गर्दा पाराग्वेको तर्फबाट ७ प्रहार भएका थिए। लगातारको दबाब झेलेका गिलले खेललाई डरलाग्दो चलचित्र जस्तै भएको बताए।

उनले भने,‘यो कुनै भयानक फिल्मजस्तै थियो। जर्मनीका खेलाडीहरू मैदानका सबै दिशाबाट अचानक देखा परिरहेका थिए। अहिले पनि हामीले यो जित हासिल गरेको विश्वास गर्न गाह्रो भइरहेको छ।’

गिलले जर्मनीका अनुभवी गोलरक्षक म्यानुएल नोयरको पनि प्रशंसा गरे। उनले भने,‘नोयर विश्वस्तरीय गोलरक्षक हुन्। पेनाल्टी सुटआउटमा उनीसँग प्रतिस्पर्धा गर्ने अवसर पाउनु विशेष अनुभव थियो। उनले पनि एउटा पेनाल्टी बचाएका थिए। उनीप्रति मेरो सम्मान छ। अब हामी शान्त भएर यो उपलब्धिको समीक्षा गर्नेछौं। हामी १२० मिनेटसम्म टिक्न सफल भयौं र अन्ततः पेनाल्टीमा भाग्य पनि हाम्रो पक्षमा रह्यो।’