नेयमारमाथि ब्राजिलको अपेक्षा

विश्वकपमा उपाधिको लक्ष्य राखेको ब्राजिलले सोमबार जापानविरुद्धको खेलबाट नकआउट चरणको यात्रा सुरु गर्दैछ।

ह्युस्टन स्टेडियममा हुने यो खेल नेपाली समयअनुसार राति १०:४५ बजे हुनेछ। प्रशिक्षक कार्लो एन्सेलोटीले अघिल्लो खेलको सुरुआती टोलीमा धेरै परिवर्तन नगर्ने संकेत दिएका छन्।

ब्राजिलका समर्थकका लागि सकारात्मक खबर भने नेयमार जुनियरको अवस्थासँग सम्बन्धित छ। चोटबाट पुनरागमन गरिरहेका नेयमारले जापानविरुद्ध अघिल्लो खेलभन्दा बढी समय मैदानमा बिताउने सम्भावना रहेको एन्सेलोटीले बताएका छन्।

नेयमारको पुनःस्थापनाको प्रगतिको प्रशंसा गर्दै एन्सेलोटीले भने,‘पछिल्लो एक सातामा उनको अवस्थामा उल्लेखनीय सुधार आएको छ। अघिल्लो खेलमा दुर्भाग्यवश उनले १५ मिनेटभन्दा बढी खेल्न पाएनन्। अहिले भने उनी धेरै समय खेल्न सक्ने अवस्थामा पुगेका छन्।’

जापानविरुद्धको सम्भावित टोलीबारे स्पष्ट जानकारी नदिए पनि एन्सेलोटीले ठूलो परिवर्तन नहुने संकेत दिएका छन्। ‘हाम्रो टोलीमा धेरै परिवर्तन गर्नुपर्छ जस्तो लाग्दैन। अन्तिम निर्णय अन्तिम प्रशिक्षणपछि हुनेछ। अहिले हाम्रो सम्पूर्ण ध्यान खेलमै केन्द्रित छ। हामी निकै अनुशासित र बलियो प्रतिद्वन्द्वीविरुद्ध खेल्दैछौं, त्यसैले मैदानमा के गर्नुपर्छ भन्नेबारे हामी स्पष्ट छौं,’उनले भने।

समूह चरणको अन्तिम खेलमा स्कटल्यान्डविरुद्ध मैदान उत्रिएको टोली नै लगभग कायम रहने अपेक्षा गरिएको छ। विशेषगरी रक्षापंक्ति, मिडफिल्ड र आक्रमणमा एन्सेलोटीले आफ्नो मनपर्ने संयोजन फेला पारेको देखिन्छ।

चोट लाग्नुअघि राफिन्हाले बायाँ विंगमा अपेक्षाअनुसार प्रदर्शन गर्न सकेका थिएनन्। उनको स्थानमा स्कटल्यान्डविरुद्ध खेलेका रायानले प्रभावशाली प्रदर्शन गर्दै प्रशिक्षकको विश्वास जितेका छन्। यस्तै, अघिल्लो खेलमा ७५औं मिनेटमा मैदान प्रवेश गरेका नेयमारले यसपटक अझ बढी समय खेल्ने सम्भावना छ।

ब्राजिलको सम्भावित सुरुआती टोली:

एलिसन बेकर (गोलकिपर)‚ डानिलो, मार्किन्होस, गाब्रिएल मागाल्हाइस, डगलस सान्तोस‚ कासेमिरो, ब्रुनो गिमाराएस, लुकास पाकेता‚ रायान, म्याथियस कुन्हा र भिनिसियस जुनियर।

ब्राजिल र जापानबीच हालसम्म १४ पटक प्रतिस्पर्धा भएको छ। तीमध्ये ब्राजिलले ११ खेल जितेको छ भने दुई खेल बराबरीमा सकिएका छन्। जापानले एक खेल जितेको छ। यद्यपि‚ पछिल्लो भेटको सम्झना भने ब्राजिलका लागि सुखद् छैन।

सन् २०२५ को अक्टोबरमा विश्वकप तयारीका क्रममा भएको मैत्रीपूर्ण खेलमा जापानले ब्राजिललाई ३–२ ले पराजित गरेको थियो। त्यो ब्राजिलविरुद्ध जापानको पहिलो जित मात्र नभई ब्राजिलको पोस्टमा जापानले गरेको सर्वाधिक गोल पनि थियो। त्यसैले उत्कृष्ट हेड–टु–हेडमा रेकर्ड भए पनि एन्सेलोटीको टोली जापानलाई कुनै हालतमा कमजोर आँक्ने पक्षमा छैन।