कीर्तिमानको कीर्तिमानी मेसी

अर्जेन्टिनाका कप्तान लिओनल मेसीले फिफा विश्वकपमा लगातार सात खेलमा गोल गर्ने पहिलो खेलाडी बन्दै अर्को ऐतिहासिक कीर्तिमान आफ्नो नाममा लेखाएका छन्।

आइतबार जोर्डनविरुद्धको समूह चरणको अन्तिम खेलमा मेसीले दोस्रो हाफमा मैदान प्रवेश गर्दै उत्कृष्ट फ्रिकिकमार्फत गोल गरेका हुन्। खेलको ८०औं मिनेटमा पेनाल्टी क्षेत्रबाहिर फाउल भएपछि प्राप्त फ्रिकिक अवसरलाई उनले दुई रक्षकबीचबाट बललाई जालीको बायाँ कुनामा पठाएका थिए।

योसँगै मेसीले विश्वकपमा आफ्नो कुल गोल संख्या १९ पुर्‍याउँदै प्रतियोगितामा सर्वाधिक गोल गर्ने खेलाडीका रूपमा आफ्नो कीर्तिमान थप मजबुत बनाएका छन्।

३९ वर्षीय मेसीले करिअरको ७२औं फ्रिकिक गोल तथा अर्जेन्टिनाका लागि १२औं फ्रिकिक गोल गरेका हुन्। अन्तर्राष्ट्रिय फुटबलमा उनको कुल गोल संख्या १२३ पुगेको छ, जुन सर्वकालीन सूचीमा दोस्रो स्थानमा रहेको छ। यस सूचीमा पोर्चुगलका क्रिस्टियानो रोनाल्डो १४५ गोलसहित शीर्ष स्थानमा छन्। मेसीले यो उपलब्धि २०२ अन्तर्राष्ट्रिय खेलमा हासिल गरेका हुन्।

यसअघि विश्वकपमा लगातार ६ खेलमा गोल गर्ने कीर्तिमान फ्रान्सका जस्ट फन्टेन र ब्राजिलका महान् खेलाडी जाइर्जिन्होसँग संयुक्त रूपमा मेसीकै नाममा थियो। अब उनले लगातार सात खेलमा गोल गर्दै नयाँ इतिहास रचेका छन्।

समूह ‘जे’ को विजेता बनेर अर्जेन्टिना यसअघि नै नकआउट चरणमा पुगिसकेको थियो भने जोर्डन प्रतियोगिताबाट बाहिरिइसकेको थियो। त्यसैले मेसीलाई प्रशिक्षकले सुरुआती टोलीमा नराखी दोस्रो हाफको ६०औं मिनेटमा लाउटारो मार्टिनेजको स्थानमा मैदान प्रवेश गराएका थिए। पहिलो हाफमा अर्जेन्टिनाका लागि लाउटारो मार्टिनेजले पेनाल्टीमार्फत गोल गरेका थिए।