अब कंगोको प्रतिस्पर्धी इङ्ल्यान्ड

काठमाडौं। जुड बेलिङ्घम र ह्यारी केन गोलसँगै इङ्ग्ल्यान्ड पनामालाई २–० ले पराजित गर्दै फिफा विश्वकपको समूह ‘एल’ को विजेता बनेको छ।

शनिबार न्यू जर्सीस्थित मेटलाइफ स्टेडियममा भएको खेलमा इङ्ग्ल्यान्डले पहिलो हाफमा गोलरहित बराबरी खेले पनि दोस्रो हाफमा उत्कृष्ट प्रदर्शन गर्दै महत्त्वपूर्ण जित निकालेको हो। यस जितसँगै इङ्ग्ल्यान्डले समूह चरण दुई जित र एक बराबरीसहित सात अंक जोड्दै शीर्ष स्थानमा रह्यो।

समूह विजेता बनेको इङ्ग्ल्यान्डले अब अन्तिम ३२ को खेलमा कंगोसँग प्रतिस्पर्धा गर्नेछ। उक्त खेल जित्ने टोलीले त्यसपछि मेक्सिको वा इक्वेडरमध्ये एकसँग क्वार्टरफाइनल प्रवेशका लागि खेल्नेछ। यदि इङ्ग्ल्यान्ड समूह उपविजेता बनेको भए भने पोर्चुगलसँग भेट हुने सम्भावना थियो।

खेलको पहिलो हाफमा पनामाले इङ्ग्ल्यान्डलाई गोलरहित बनाए पनि दोस्रो हाफमा जुड बेलिङ्घम चम्किए। खेलको ६२औं मिनेटमा बुकायो साकाको कर्नर प्रहारलाई बेलिङ्घमले उत्कृष्ट फिनिस गर्दै टोलीलाई अग्रता दिलाए।

त्यसको पाँच मिनेटपछि बेलिङ्घमकै क्रसमा कप्तान ह्यारी केनले हेडमार्फत गोल गर्दै इङ्ग्ल्यान्डको अग्रता दोब्बर बनाए। यो केनको अन्तर्राष्ट्रिय करिअरको ८२औं तथा विश्वकपमा व्यक्तिगत ११औं गोल हो। यससँगै उनले ग्यारी लिनेकरलाई पछि पार्दै इङ्ग्ल्यान्डका सर्वाधिक विश्वकप गोलकर्ता बन्न सफल भए।

रियल मड्रिडका मिडफिल्डर बेलिङ्घम चोटका कारण लामो समय मैदानबाहिर रहे पनि विश्वकपमा भने उत्कृष्ट लयमा देखिएका छन्। कप्तान केनले बेलिङ्घम पूर्ण रूपमा फिट देखिएको र विश्वलाई आफ्नो क्षमता देखाउन आतुर रहेको बताए।

यस जितसँगै इङ्ग्ल्यान्डले पछिल्ला आठ विश्वकपमध्ये सातौं पटक नकआउट चरणमा स्थान बनाउन सफल भएको छ।

पनामाले भने लगातार तीन खेल हार्दै प्रतियोगिताबाट बाहिरिएको छ। टोलीले समूह चरणमा कुनै गोल गर्न सकेन। इन्जुरी समयमा जोसे फजार्डोले गोल गरे पनि अफसाइडका कारण त्यो गोल मान्य भएन। यससँगै पनामा विश्वकपका पहिलो ६ खेल लगातार हार्ने टोलीको सूचीमा समावेश भएको छ।