जोर्डनविरुद्ध मेसी सुरुआती टोलीमा नहुने

काठमाडौं। विश्वकप इतिहासका सर्वाधिक गोलकर्ता तथा साबिक विजेता अर्जेन्टिनाका कप्तान लिओनल मेसी जोर्डनविरुद्धको समूह चरणको अन्तिम खेलमा सुरुआती टोलीमा रहने छैनन्।

मुख्य प्रशिक्षक लिओनल स्कालोनीले शुक्रबार मेसीले खेलको सुरुआत बेन्चबाट गर्ने पुष्टि गरेका छन्। मेसीको ३९औं जन्मदिनको दुई दिनपछि आयोजित पत्रकार सम्मेलनमा स्कालोनीले मेसी सुरुदेखि नखेल्ने भए पनि खेलको केही समयपछि मैदानमा आउने संकेत दिए।

यद्यपि‚ उनले मेसी कहिले मैदान प्रवेश गर्ने वा जोर्डनविरुद्धको अन्तिम सुरुआती टोली कस्तो हुने भन्नेबारे खुलाएका छैनन्। पहिलो पटक विश्वकप खेलिरहेको जोर्डनले समूह चरणका दुवै खेल गुमाइसकेको छ भने अर्जेन्टिनाले समूह ‘जे’को विजेताका रूपमा यसअघि नै नकआउट चरणमा स्थान सुरक्षित गरिसकेको छ। त्यसैले स्कालोनीले मुख्य खेलाडीलाई विश्राम दिने रणनीति अपनाएका हुन्।

मेसीले यस विश्वकपका पहिलो दुई खेलमै अर्जेन्टिनाका पाँचै गोल गरेका छन्। अल्जेरियाविरुद्ध ह्याट्रिक पूरा गर्दै उनले जर्मनीका मिरोस्लाभ क्लोजेको १६ विश्वकप गोलको कीर्तिमान बराबरी गरेका थिए। त्यसपछि अस्ट्रियाविरुद्ध दुई गोल गर्दै उनले विश्वकप इतिहासमा सर्वाधिक १८ गोल गर्ने खेलाडीको नयाँ कीर्तिमान बनाएका छन्।

क्लोजेले चार संस्करणको विश्वकपमा जर्मनीका लागि २४ खेल खेल्दै १६ गोल गरेका थिए। फ्रान्सका स्टार किलियन एमबाप्पेले पनि इराकविरुद्ध दुई गोल गर्दै क्लोजेको कीर्तिमान बराबरी गरेका थिए। यद्यपि‚ नर्वेविरुद्धको अन्तिम समूह खेलमा गोल गर्न नसकेपछि उनी १६ गोलमै सीमित छन्।

मेसीले अर्जेन्टिनाका लागि हालसम्म २०१ अन्तर्राष्ट्रिय खेल खेलिसकेका छन्। उनले विश्वकपमा फिफा कीर्तिमान २८ खेल खेलिसकेका छन् र लगातार ६ विश्वकप खेलमा गोल गर्ने दुर्लभ उपलब्धि पनि हासिल गरेका छन्। यसअघि यस्तो कीर्तिमान फ्रान्सका जस्ट फोन्तेन र ब्राजिलका जाइरजिन्होले मात्र बनाएका थिए।

विश्वकपअघि इन्टर मियामीबाट खेल्ने क्रममा मेसी सामान्य ह्यामस्ट्रिङ समस्याबाट गुज्रिएका थिए। यद्यपि‚ त्यसयता उनी पूर्ण रूपमा फिट देखिएका छन्। अर्जेन्टिनाले फाइनलसम्म पुग्न सके अब १७ दिनभित्र पाँचवटा नकआउट खेल खेल्नुपर्ने भएकाले प्रशिक्षक स्कालोनी मेसीको खेल समय व्यवस्थापन गर्न चाहन्छन्।

समूह चरण अपराजित रहने लक्ष्य राखेको अर्जेन्टिनाले मेसी मात्र होइन, अन्य केही मुख्य खेलाडीलाई पनि विश्राम दिने अपेक्षा गरिएको छ। नियमित टोलीबाट गोलरक्षक एमिलियानो मार्टिनेज मात्र सुरुआती टोलीमा रहने सम्भावना छ।

मेसीको स्थानमा युवा मिडफिल्डर निकोलास पाजले पहिलो पटक सुरुआती टोलीमा अवसर पाउने अपेक्षा गरिएको छ। उनले अल्जेरियाविरुद्धको खेलमा मेसीको स्थानमा प्रतिस्थापन खेलाडीका रूपमा विश्वकप डेब्यु गरेका थिए।

जोर्डनविरुद्धको खेलबारे स्कालोनीले भने,‘हाम्रो प्रयास टोलीले सधैंझैँ एउटै शैलीमा खेलोस् भन्ने हो। जोर्डन राम्रो टोली हो र हामी उनीहरूलाई हल्का रूपमा लिँदैनौं। अघिल्लो खेलका केही पक्ष सुधार गर्दै बल आफ्नो नियन्त्रणमा राख्ने र खेलमा प्रभुत्व जमाउने लक्ष्यका साथ मैदानमा उत्रिनेछौं।’