ठगीको आरोपा एन्फाका पूर्वअध्यक्ष पक्राउ

काठमाडौं। अखिल नेपाल फुटबल संघ (एन्फा)का पूर्वअध्यक्ष कर्माछिरिङ शेर्पा ठगी तथा आपराधिक विश्वासघातसम्बन्धी कसुरमा पक्राउ परेका छन्।

नेपाल प्रहरीको केन्द्रीय अनुसन्धान ब्युरो (सीआइबी)का प्रवक्ता, प्रहरी वरिष्ठ उपरीक्षक (एसएसपी) अनुपम शमशेर जबराका अनुसार उनलाई शुक्रबार साँझ बुढानिलकण्ठ नगरपालिका ६, गणेशचोकबाट पक्राउ गरिएको हो।

हात्तीगौँडामा सञ्चालित टुङ्गराम इन्टरनेशनल एकेडेमीको आठ करोड ७८ लाख ३० हजार रकम अपचलन गरेर आरोपमा उनलाई अनुसन्धानका लागि पक्राउ जबराले जानकारी दिए। शेर्पा ‘ए’ डिभिजन क्लब हिमालयन शेर्पाका अध्यक्षसमेत हुन्।

‘डर, त्रास, अनुचित प्रभावमा पारी विद्यालयको ८,७८,३०,८०२ रकम हिनामिना गरेको, विद्यालयको भक्तपुर जिल्ला, दधिकोट गा.वि.स., वडा न.२ मा रहेको जग्गामध्ये करिब २९-४-२-१ रोपनी जग्गा निज सम्बद्ध कम्पनीहरूलाई बिक्री गरेको, विद्यालयका लागि सवारीसाधन खरिद गर्ने रकमबाट व्यक्तिगत तथा निज सम्बद्ध कम्पनीको नाममा जग्गा जमिन र सवारीसाधन खरिद गरी विद्यालयको हक टुटाई आफ्नो जिम्मामा रहेको विद्यालयको रकम हिनामिना गरी आफ्नो व्यक्तिगत लाभ लिई ठगी, आपराधिक विश्वासघातसम्बन्धी कसुरमा कानुन बमोजिम कारबाहीको लागि प्राप्त हुन आएको जाहेरी दरखास्त सन्दर्भमा पक्राउ गरिएको हो,’ सीआइबीले भनेको छ।