नायक डेम्बेले

काठमाडौं। लिओनल मेसी र किलियन एमबाप्पेमात्र होइन, अब २०२६ फिफा विश्वकपको गोल्डेन बुटको दौडमा ओस्मान डेम्बेले पनि बलियो दाबेदार बनेका छन्।

शुक्रबार भएको समूह चरणको अन्तिम खेलमा डेम्बेलेले पहिलो हाफमै ह्याट्रिक गर्दै फ्रान्सलाई नर्वेमाथि ४–१ को प्रभावशाली जित दिलाए। डेम्बेलेले खेलको सातौं, २०औं र ३२औं मिनेटमा गोल गर्दै पहिलो हाफमै ह्याट्रिक पूरा गरे।

विश्वकपमा सन् १९९४ पछि पहिलो हाफमै ह्याट्रिक भएको यो पहिलो घटना हो। त्यसबेला अमेरिकामा भएको विश्वकपमा रुसका ओलेग सालेन्कोले क्यामरुनविरुद्ध पहिलो हाफमै आफ्ना पाँच गोलमध्ये तीन गोल गरेका थिए।

खेलपछि डेम्बेलेले व्यक्तिगत उपलब्धिभन्दा टोलीको सफलतालाई प्राथमिकता दिए। उनले भने,‘यो मेरो लागि विशेष क्षण हो। तर‚ सबैभन्दा महत्त्वपूर्ण कुरा हामी समूह विजेताका रूपमा नकआउट चरणमा पुगेका छौं। अब हाम्रो सम्पूर्ण ध्यान राउन्ड अफ ३२ मा केन्द्रित छ।’

सन् २०१८ को विश्वकप विजेता फ्रान्सले यसअघि नै नकआउट चरणमा स्थान सुरक्षित गरिसकेको थियो। नर्वेले पनि दोस्रो स्थानमा रहँदै अन्तिम ३२ मा स्थान बनाएको छ।

फ्रान्सका लागि चौथो गोल दोस्रो हाफको इन्जुरी समयमा डिजिरे डुएले गरे। तीन खेलमा फ्रान्सले १० गोल गर्दै प्रतियोगितामा आफ्नो आक्रामक प्रदर्शनलाई निरन्तरता दिएको छ।

डेम्बेलेले प्रतियोगितामा आफ्नो गोलसंख्या चार पुर्‍याएका छन् भने २०२५ को बालोन डी’ओर विजेताका रूपमा उनी गोल्डेन बुटको प्रतिस्पर्धामा मजबुत बनेका छन्।

नर्वेका लागि थेइलो आसगार्डले डेम्बेलेको दोस्रो गोलको केही सेकेन्डपछि एक गोल फर्काए पनि त्यसले खेलको दिशा बदल्न सकेन। डेम्बेलेले केही मिनेटपछि नै आफ्नो तेस्रो गोल गर्दै फ्रान्सको अग्रता फेरि दुई गोलमा पुर्‍याए।

एमबाप्पेले पनि उत्कृष्ट प्रदर्शन जारी राखे। उनले डेम्बेलेको पहिलो गोलका लागि असिस्ट दिए। विश्वकपमा उनले हालसम्म १७ खेलमा १६ गोल र ४ असिस्ट गरिसकेका छन्। यसअघि सेनेगल र इराकविरुद्धको खेलमा उनले समान दुई–दुई गोल गरेका थिए।

नर्वेले भने मुख्य स्ट्राइकर एर्लिङ हालान्डसहित १० नियमित खेलाडीलाई विश्राम दिएको थियो। प्रशिक्षक स्टोले सोलबाकेनले छोटो विश्रामका कारण यस्तो निर्णय आवश्यक रहेको बताए।

अब राउन्ड अफ ३२ मा फ्रान्सले न्यु जर्सीको इस्ट रदरफोर्डमा उत्कृष्ट तेस्रो स्थान हासिल गर्ने टोलीमध्ये एकसँग प्रतिस्पर्धा गर्नेछ भने नर्वेले टेक्सासको आर्लिङ्टनमा आइभरी कोस्टको सामना गर्नेछ।