आशवादी क्रोएसिया

काठमाडौं। क्रोएसियाले मंगलबार सम्पन्न विश्वकप समूह ‘एल’ को खेलमा पानामालाई १–० ले पराजित गर्दै नकआउट चरण पुग्ने आशा कायम राखेको छ।

यस हारसँगै पानामा प्रतियोगिताबाट बाहिरिएको छ। दुई पटकको विश्वकप सहभागितामा अझै आफ्नो पहिलो अंकको खोजीमै रहेको छ। टोरन्टोस्थित बीएमओ फिल्डमा भएको खेलको पहिलो हाफ निकै सुस्त रह्यो।

तर‚ दोस्रो हाफ सुरु भएपछि क्रोएसियाले खेलमा निर्णायक गोल निकाल्न सफल भयो। खेलको ५४औं मिनेटमा जोसिप स्टानिसिचले दिएको आकर्षक क्रसलाई प्रतिस्थापन खेलाडी आन्टे बुडिमिरले सहज रूपमा जाली चुमाउँदै गोल गरे। मैदान प्रवेश गरेको चार मिनेटमै उनले टोलीलाई अग्रता दिलाएका थिए।

गोलपछि क्रोएसियाले अर्को अवसर पनि सिर्जना गरेको थियो। ४० वर्षीय कप्तान लुका मोड्रिचले आफ्नो २००औं अन्तर्राष्ट्रिय खेल खेल्दै उत्कृष्ट पास दिएका थिए। तर‚ मार्को पासालिचको प्रहार पानामाका गोलकिपर ओरलान्डो मोस्केराले रोके।

पानामाले खेलमा फर्कने प्रयासस्वरूप ६७औं मिनेटमा लगातार तीन अवसर सिर्जना गर्‍यो। तर‚ क्रोएसियाका गोलकिपर डोमिनिक लिभाकोभिच उत्कृष्ट प्रदर्शन गर्दै तीनवटै प्रहार बचाउन सफल भए। तेस्रो अवसरमा उनले बललाई छुँदै क्रसबारमाथिबाट बाहिर पठाएका थिए।

यस जितपछि समूह ‘एल’ को प्रतिस्पर्धा थप रोचक बनेको छ। दुई खेलपछि इङ्ग्ल्यान्ड र घाना समान ४ अंकका साथ शीर्ष स्थानमा छन् भने क्रोएसियाको ३ अंक पुगेको छ।

अब समूह चरणको अन्तिम खेल शनिबार हुनेछ। इङ्ग्ल्यान्डले पानामासँग खेल्नेछ भने घाना र क्रोएसिया आमनेसामने हुनेछन्। यी खेलपछि समूह ‘एल’ बाट नकआउट चरणमा पुग्ने टोलीको टुंगो लाग्नेछ।