आलोचकलाई चुप गराएका रोनाल्डो

पोर्चुगलका कप्तान क्रिस्टियानो रोनाल्डोले उज्बेकिस्तानविरुद्धको खेलमा दुई गोल गर्दै विश्वकप इतिहासमा लगातार ६ वटा फरक संस्करणमा गोल गर्ने पहिलो खेलाडी बनेका छन्।

बुधबार भएको खेलमा पोर्चुगलले उज्बेकिस्तानलाई ५–० ले पराजित गरेको हो। ४१ वर्षीय रोनाल्डोले खेलको छैटौं मिनेटमा जोआओ कान्सेलोको पासलाई सदुपयोग गर्दै दायाँ खुट्टाले गोल गरेका थिए।

उनले दोस्रो गोल ३९औं मिनेटमा गरे। ब्रुनो फर्नान्डेसको पास प्राप्त गरेपछि उनले नजिकको पोस्टतर्फ उत्कृष्ट प्रहार गर्दै पोर्चुगलको अग्रता ३–० पुर्‍याए।

उत्कृष्ट प्रदर्शनका कारण रोनाल्डो खेलको ‘म्यान अफ द म्याच’ घोषित भए।

यी गोलसँगै रोनाल्डो विश्वकपमा गोल गर्ने दोस्रो सबैभन्दा बढी उमेरका खेलाडी बनेका छन्। यसअघि क्यामरुनका रोजर मिल्लाले १९९४ को विश्वकपमा ४२ वर्षको उमेरमा गोल गरेका थिए।

रोनाल्डोले यो उपलब्धि पोर्चुगलको पहिलो खेलमा कंगोविरुद्ध १–१ को बराबरीमा गोल गर्न नसकेको भन्दै आलोचना खेप्नुपरेको केही दिनपछि हासिल गरेका हुन्।

यस वर्ष रोनाल्डो र अर्जेन्टिनाका कप्तान लिओनल मेसी विश्वकपका ६ वटा संस्करणमा खेल्ने इतिहासका पहिलो पुरुष खेलाडी बनेका छन्। रोनाल्डोले पहिलो पटक २००६ को विश्वकपमा गोल गरेका थिए।

त्यसपछि उनले २०१०, २०१४, २०१८, २०२२ र अहिले २०२६ मा पनि गोल गर्न सफल भएका छन्। मेसीसँग समान ६ वटा विश्वकप खेले पनि रोनाल्डो लगातार प्रत्येक संस्करणमा गोल गर्ने मामिलामा एक्लै अगाडि छन्। मेसीले २०१० को विश्वकपमा गोल गर्न सकेका थिएनन्।

मंगलबारका दुई गोलसँगै रोनाल्डोको विश्वकप गोल संख्या १० पुगेको छ। यता मेसीले अल्जेरियाविरुद्ध ह्याट्रिक र अस्ट्रियाविरुद्ध दुई गोल गर्दै विश्वकपमा आफ्नो कुल गोल संख्या १८ पुर्‍याएका छन्। उनी प्रतियोगिताको इतिहासकै सर्वाधिक गोलकर्ता हुन्।

रोनाल्डोले आफ्नो अन्तर्राष्ट्रिय गोल संख्या १४५ पुर्‍याउँदै यसअघिको आफ्नै कीर्तिमानलाई अझ बलियो बनाएका छन्। साथै विश्वकपमा १० गोल पुर्‍याएर उनले पोर्चुगलका महान् खेलाडी युसेबियोको ९ गोलको कीर्तिमानलाई पनि उछिनेका छन्।

उज्बेकिस्तानविरुद्धको खेल रोनाल्डोको अन्तर्राष्ट्रिय करियरको २३०औं खेल थियो, जुन पुरुष फुटबल इतिहासमै सबैभन्दा धेरै हो। सन् २०१६ मा पोर्चुगललाई युरोपियन च्याम्पियन बनाएका र म्यानचेस्टर युनाइटेड तथा रियल मड्रिडबाट पाँच पटक च्याम्पियन्स लिग जितेका रोनाल्डोका लागि यो सम्भवतः अन्तिम विश्वकप हुन सक्ने अनुमान गरिएको छ।