विश्वकप इतिहासमै इजिप्टको पहिलो जित

काठमाडौं। मोहम्मद सलाहको निर्णायक गोलको मद्दतमा इजिप्टले सोमबार बिहान न्युजिल्यान्डलाई ३–१ ले पराजित गर्दै विश्वकप इतिहासकै पहिलो जित दर्ता गरेको छ।

क्यानडाको भ्यानकुभरस्थित बीसी प्लेस स्टेडियममा भएको खेलमा सलाहले ६७औं मिनेटमा गोल गर्दै इजिप्टलाई अग्रता दिलाए। राष्ट्रिय टोलीका लागि उनको यो ६८औं अन्तर्राष्ट्रिय गोल थियो।

जारी विश्वकपमा भने उनको यो पहिलो गोल हो। ८५औं मिनेटमा सलाहलाई मैदानबाट बाहिर निकालिँदा दर्शकहरूले उभिएर सम्मान व्यक्त गरेका थिए।

यस जितसँगै इजिप्ट समूह ‘जी’ को शीर्ष स्थानमा उक्लिएको छ। यद्यपि‚ टोलीको नकआउट चरणको यात्रा अझै सुनिश्चित भइसकेको छैन। अब इजिप्टले शुक्रबार सियाटलमा इरानसँग निर्णायक खेल खेल्नेछ। यो खेलमा कम्तीमा बराबरी नतिजा आवश्यक हुनेछ।

कतार विश्वकपमा छनोट हुन नसकेको इजिप्ट यस पटक चौथो पटक विश्वकपमा सहभागी भएको हो। सलाहले यसअघि सन् २०१८ को रुस विश्वकपमा दुई गोल गरेका थिए।

खेलको १५औं मिनेटमा न्युजिल्यान्डले अग्रता लिएको थियो। इन्स्टाग्राममा चर्चित खेलाडी टिम पेयनको कर्नर पासमा फिन सुरम्यानले हेडमार्फत गोल गर्दै टोलीलाई १–० को अग्रता दिलाए। एमएलएस क्लब पोर्टल्यान्ड टिम्बर्सका डिफेन्डर सुरम्यानको यो अन्तर्राष्ट्रिय फुटबलमा तेस्रो गोल थियो।

पहिलो हाफको ३५औं मिनेटमा ओमार मार्मुशले दिएको फ्रिकिक पासलाई सलाहले गोलमा परिणत गर्ने प्रयास गरे पनि बल पोस्ट बाहिरिएको थियो।

दोस्रो हाफ सुरु भएपछि इजिप्टले दबाब बढायो। ५८औं मिनेटमा मोस्तफा जिकोले उत्कृष्ट हेडमार्फत बराबरी गोल गर्दै खेल १–१ मा ल्याए। त्यसपछि जिकोको ब्याक–हिल पासमा सलाहले सुन्दर फिनिसिङ गर्दै इजिप्टलाई २–१ को अग्रता दिलाए।

यो गोलसँगै उनी राष्ट्रिय टोलीका प्रशिक्षक होसाम हसनको सर्वाधिक गोलकर्ताको कीर्तिमान बराबरी गर्न एक गोल टाढा छन्। ८२औं मिनेटमा ट्रेजेगेटले डाइभिङ हेडरमार्फत तेस्रो गोल थप्दै इजिप्टको जित सुनिश्चित गरे।

खेलका क्रममा इजिप्टका हम्दी फाथी पहिलो हाफको अन्त्यतिर चोटग्रस्त भएपछि मैदान छाड्न बाध्य भए। उनको स्थानमा रामी राबियालाई उतारिएको थियो।

पहिलो खेलमा इजिप्टले बेल्जियमसँग १–१ को बराबरी खेलेको थियो। त्यस खेलमा इमाम आशोरले सुरुआती गोल गरे पनि बेल्जियमका रोमेलु लुकाकुको दबाबका कारण इजिप्टले आत्मघाती गोल बेहोरेको थियो।

न्युजिल्यान्डले आफ्नो पहिलो खेलमा इरानविरुद्ध दुई पटक अग्रता बनाए पनि अन्ततः २–२ को बराबरीमा रोकिएको थियो। त्यस खेलमा इलाइजा जस्टले न्युजिल्यान्डका दुवै गोल गरेका थिए।

यसअघि सन् २०१० को विश्वकपमा सहभागी भएको न्युजिल्यान्डले तीनै खेल बराबरी खेलेको थियो। समूहको अर्को खेलमा इरान र बेल्जियमले गोलरहित बराबरी खेलेका छन्। दुवै टोलीले प्रतियोगितामा लगातार दोस्रो बराबरी खेलेका हुन्। अब शुक्रबार न्युजिल्यान्डले भ्यानकुभरमै बेल्जियमसँग प्रतिस्पर्धा गर्नेछ।