‘गोल्डेन बुट’को दौडमा नयाँ अनुहारको दाबी

काठमाडौं। उत्तर अमेरिकामा जारी फिफा विश्वकप २०२६ मा मंगलबार बिहानसम्म समूह चरणका १६ खेल सम्पन्न भएका छन्। पहिलो पटक ४८ टोलीको सहभागिता रहेको इतिहासकै सबभन्दा ठूलो विश्वकपमा १६ खेल सकिँदा पनि सहभागी सबैले आफ्नो पहिलो खेल खेल्न भ्याइसकेका छैनन्।

तरऽ एउटा नयाँ संकेत चाहिँ देखिइसकेको छ। त्यो हो, एडिडास गोल्डेन बुटको दौडमा प्रतियोगिता सुरु हुनुपूर्व अनुमान गरिएका भन्दा नयाँ खेलाडीको बलियो दाबेदारी। प्रतियोगितामा १६ खेल सकिँदा ३९ फरक खेलाडीले २.८८ को औसतमा ४६ गोल गरिसकेका छन्। जहाँ प्रतियोगिता सुरु हुनुभन्दा अगाडि कसैले ध्यान नदिएका नाम पनि २ गोलका साथ अग्रस्थानमा छन्। प्रतियोतिगामा अहिलेसम्म ४ खेलाडीले २ गोल गर्दा ३५ जनाले १ गोल गरेका छन्। ३ गोल आत्मघाती भएका छन्।

मंगलबार बिहान इरानसँग २–२ को बराबरी नतिजा निकालेको खेलमा न्युजिल्यान्डका इलिजा जस्टले २ गोल गरे। जस्टअघि नै प्रतियोगिताको पहिलो खेलमा २ गोल गर्ने सफलता जर्मनीका काइ हार्भाट्ज, स्विडेनका यासिन अयारी र अमेरिकाका फ्लोरियन बालोगन छन्।

एएस मोनाको एफसीका २५ वर्षे बालोगनले लस एन्जलसमा भएको समूह ‘डी’ को पहिलो खेलमा पाराग्वेमाथि अमेरिकाले ४–१ को जित हासिल गरेको खेलमा मध्यान्तरअघि नै २ गोल गरिसकेका थिए। सन् १९३० मा सम्पन्न पहिलो विश्वकपपछि प्रतियोगिताको पहिलो खेलमा अमेरिकाका लागि २ वा त्योभन्दा बढि गोल गर्ने उनी पहिलो खेलाडी बनेका थिए।

बालोगनलगत्तै जर्मनीका हार्भाट्जले विश्वकपको पहिलो खेलमा २ गोल गर्ने सफलतामा नाम लेखाए। समूह ‘ई’ को खेलमा विश्वकपमा पहिलो पटक सहभागिता जनाइरहेको नवप्रवेशी कुराकाओलाई प्रतिद्वन्द्वीका रूपमा पाउँदा जर्मनीका लागि त्यो खेल सहज बनेको थियो। ७–१ को फराकिलो जित हासिल गरेको उक्त खेलमा आर्सनलका स्ट्राइकरले २ गोल गरेका थिए।

त्यो खेल हार्भाट्जसँगै चार पटकको विश्व च्याम्पियन जर्मनीका लागि पनि विशेष बन्यो। यसपाली विश्वकपमा खासै चर्चामा नरहेको जर्मनीले सन् २०१४ मा पछिल्लो पटक उपाधि जित्दा सेमिफाइनलमा आयोजक ब्राजिलमाथि पनि ७–१ कै अन्तरमा जित हासिल गरेको थियो।

हार्भाट्जले २ गोल गरेकै दिन स्विडेनका अयारीले पनि ट्युनिसियामाथि ५–१ को जित हासिल गर्दा व्यक्तिगत २ गोल गरेर एडिडास गोल्डेन बुटको दाबेदारका रूपमा आफूलाई उभ्याएका थिए। न्युजिल्यान्डका जस्टले मंगलबार बिहान लस एन्जलसमा २ गोल गरेपछि जारी विश्वकपको २ गोल क्लबमा नाम लेखाउने खेलाडीको संख्या ४ पुगेको छ।

विश्वकपमा अधिकांश मुख्य दाबेदार देश तथा शीर्ष स्ट्राइकरहरुले पहिलो खेल नै खेल्न नभ्याइसकेको अवस्थामा गोल्डेन बुट कसले जित्ला भन्ने अनुमान कठिन हुन सक्छ। प्रतियोगिताका आगामी खेलहरुले पक्कै पनि यो दौडलाई थप रोमाञ्चक बनाउने नै छन्।

२ गोल गर्नेहरू

फ्लोरियन बालोगन (अमेरिका) – एसिस्ट ०

यासिन अयारी (स्विडेन) – एसिस्ट ०

काइ हार्भाट्ज (जर्मनी) – एसिस्ट ०

इलिजा जस्ट (न्युजिल्यान्ड) – एसिस्ट ०

१ गोल गर्नेहरू

डेनिज उन्डाभ (जर्मनी) – एसिस्ट २

एलेक्जेन्डर इसाक (स्विडेन) – एसिस्ट २

नाथानियल ब्राउन (जर्मनी) – एसिस्ट १

ह्वाङ इन बियोम (दक्षिण कोरिया) – एसिस्ट १

भिक्टर ग्योकर्स (स्विडेन) – एसिस्ट १

रामिन रेजाइन (इरान) – एसिस्ट १

मिकाइल स्याङबर्ग (स्विडेन) – एसिस्ट ०

जियोभानी रेइना (अमेरिका) – एसिस्ट ०

काइल लारिन (क्यानाडा) – एसिस्ट ०

ह्योङ ग्यु (दक्षिण कोरिया) – एसिस्ट ०

अमाद दियालो (आइभोरी कोष्ट) – एसिस्ट ०

माउरिसियो (पाराग्वे) – एसिस्ट ०

इरानकुन्डा (अस्ट्रेलिया) – एसिस्ट ०

लुकिच (बोस्निया हर्जगोभिना) – एसिस्ट ०

जमाल मुसियाला (जर्मनी) – एसिस्ट ०

क्रिसेन्सियो समरभिल (नेदरल्यान्ड्स) – एसिस्ट ०

इमाम अशहोर (इजिप्ट) – एसिस्ट ०

फेलिक्स एनमेचा (जर्मनी) – एसिस्ट ०

जिमेनेज (मेक्सिको) – एसिस्ट ०

क्विनोनेस (मेक्सिको) – एसिस्ट ०

अराउजो (उरुग्वे) – एसिस्ट ०

जोन म्याकघिन (स्कटल्यान्ड) – एसिस्ट ०

इस्माइल साइबारी (मोरक्को) – एसिस्ट ०

डाइची कामाडा (जापान) – एसिस्ट ०

केइटो नाकामुरा (जापान) – एसिस्ट ०

भर्जिल भान डाइक (नेदरल्यान्ड्स) – एसिस्ट ०

लाडिस्लाभ क्रेज्की (चेकिया) – एसिस्ट ०

कोनोर मेटकाल्फ (अस्ट्रेलिया) – एसिस्ट ०

ओमार रेकिक (ट्युनिसिया) – एसिस्ट ०

मोहम्मद मोहेबी (इरान) – एसिस्ट ०

अब्दुल्लाह अल अमिरी (साउदी अरेबिया) – एसिस्ट ०

लिभानो कोमेनेन्सिया (कुराकाओ) – एसिस्ट ०

निको सटरब्रेक (जर्मनी) – एसिस्ट ०

ब्रेल इम्बोलो (स्विट्जरल्यान्ड) – एसिस्ट ०

भिनिसियस जुनियर (ब्राजिल) – एसिस्ट ०

विश्वकपमा सबभन्दा बढि गोल गर्ने खेलाडीले एडिडास गोल्डेन बुटको पुरस्कार पाउनेछन्। प्रतियोगिता सकिँदा दुई वा त्योभन्दा बढि खेलाडीको गोलसंख्या बराबर भएको अवस्थामा फिफाको प्राविधिक टोलीले निर्णय गरेअनुसार गोलका लागि साथीलाई अवसर सिर्जना गरेको आधारमा गोल्डेन बुट विजेता निर्धारण गरिन्छ।

गोलसँगै एसिस्ट पनि बराबर भएमा चाँही ति खेलाडीले प्रतियोगितामा खेलेको कुल समयको मूल्यांकन गरिन्छ। जहाँ कम मिनेट खेलेर बढि गोल र एसिस्ट गर्नेले प्राथमिकता पाउने फिफाले जनाएको छ।