दक्षिण कोरियाको उत्कृष्ट पुनरागमन

काठमाडौं। फिफा विश्वकप २०२६ अन्तर्गत समूह ‘ए’ को उद्घाटन खेलमा दक्षिण कोरियाले उत्कृष्ट पुनरागमन गर्दै चेक गणतन्त्रमाथि २–१ को रोमाञ्चक जित हासिल गरेको छ।

खेलको ८०औं मिनेटमा वैकल्पिक खेलाडी ओ ह्योन–ग्युले निर्णायक गोल गर्दै दक्षिण कोरियालाई महत्त्वपूर्ण तीन अंक दिलाए।

खेलको सुरुआतदेखि नै दक्षिण कोरियाले आक्रामक खेल प्रस्तुत गरेको थियो। कप्तान सन ह्युङ–मिनले केही राम्रो अवसर पाए पनि त्यसलाई गोलमा परिणत गर्न सकेनन्।

५९औं मिनेटमा भने चेक गणतन्त्रले खेलको प्रवाहविपरीत अग्रता लिन सफल भयो। कप्तान लाडिस्लाभ क्रेजीले लामो थ्रो–इनबाट आएको बललाई हेडरमार्फत जाली चुमाउँदै टोलीलाई १–० को अग्रता दिलाए।

तर, चेक टोलीको खुशी धेरैबेर टिकेन। ६७औं मिनेटमा ह्वाङ इन–बोमले संयमित प्रदर्शन गर्दै गोलरक्षकमाथिबाट बल उछालेर सुन्दर गोल गरे र खेल १–१ को बराबरीमा ल्याए।

त्यसपछि ७७औं मिनेटमा टोमास सौचेकले फ्रिकिकबाट आएको बललाई हेडरमार्फत गोलमा परिणत गर्दै चेक गणतन्त्रलाई पुनः अग्रता दिलाएको जस्तो देखिएको थियो। तर, भिडियो समीक्षापछि उक्त गोल अफसाइडका कारण रद्द गरियो।

गोल रद्द भएको तीन मिनेट नबित्दै दक्षिण कोरियाले खेल पल्टायो। ह्वाङ इन–बोमले उत्कृष्ट पास निकाल्दै बल ओ ह्योन–ग्युलाई उपलब्ध गराए, जसलाई उनले नजिकको दूरीबाट सहजै गोलमा परिणत गरे।

बाँकी समयमा चेक गणतन्त्रले बराबरी गोलका लागि प्रयास गरे पनि दक्षिण कोरियाली रक्षापंक्तिले कुनै अवसर नदिँदा खेल २–१ मै समाप्त भयो। यस जितसँगै दक्षिण कोरियाले विश्वकप अभियान विजयी सुरुआत गरेको छ।

समूह ‘ए’ मा मेक्सिकोले दक्षिण अफ्रिकालाई २–० ले हराएर शीर्ष स्थान ओगटेको छ। अब दक्षिण कोरियाले आगामी बिहीबार ग्वाडालाहारामा सह–आयोजक मेक्सिकोसँग प्रतिस्पर्धा गर्नेछ। चेक गणतन्त्रले भने एटलान्टामा दक्षिण अफ्रिकाको सामना गर्नेछ।