अनुशासनहीन विश्वकप

काठमाडौं। फिफा विश्वकप २०२६ को उद्घाटन खेलले अन्तर्राष्ट्रिय फुटबलमा दुर्लभ कीर्तिमान राखेको छ। मेक्सिको र दक्षिण अफ्रिकाबीच भएको खेलमा तीन खेलाडीलाई रातो कार्ड देखाइएपछि यो खेल विश्वकप इतिहासकै विशेष घटनामध्ये एक बनेको छ।

मेक्सिको सिटीस्थित प्रसिद्ध एज्टेका स्टेडियममा बिहीबार सम्पन्न खेलमा दक्षिण अफ्रिकाका स्पेफेलो सिथोले र थेम्बा ज्वाने तथा मेक्सिकोका सिजार मोन्टेसले रातो कार्ड पाए।

सन् २००६ को जर्मनी विश्वकपमा पोर्चुगल र नेदरल्यान्ड्सबीचको खेलपछि एउटै विश्वकप खेलमा तीन वा सोभन्दा बढी खेलाडी निष्कासित भएको यो पहिलो घटना हो। उक्त खेलमा चार खेलाडीले रातो कार्ड पाएका थिए, जुन अहिलेसम्मको विश्वकप कीर्तिमान हो।

यसअघि सन् २०२२ को कतार विश्वकपभर जम्मा चारवटा मात्र रातो कार्ड देखाइएको थियो। विश्वकपको उद्घाटन खेलमै तीन खेलाडी बाहिरिएको यो पहिलो घटना पनि हो।

अझ विशेष कुरा के भने तीनै खेलाडीले सिधै रातो कार्ड पाएका थिए। कुनै पनि खेलाडी दुई पहेँलो कार्डपछि निष्कासित भएका थिएनन्। खेलमा मेक्सिकोले दक्षिण अफ्रिकामाथि २–० को सहज जित दर्ता गर्‍यो।

दोस्रो हाफ सुरु भएको केही समयमै दक्षिण अफ्रिकाका सिथोलेले मेक्सिकोका ब्रायन गुटिएरेजलाई पेनाल्टी क्षेत्रको किनारमा फाउल गरेपछि रेफ्रीले सिधै रातो कार्ड देखाएका थिए।

८४औं मिनेटमा भिडियो सहायक रेफ्री (भीएआर) को समीक्षापछि दक्षिण अफ्रिकाका कप्तान थेम्बा ज्वानेलाई रोबर्टो अल्भाराडोको अनुहारमा प्रहार गरेपछि रातो कार्ड दिइयो। यससँगै दक्षिण अफ्रिका नौ खेलाडीमा सीमित भयो।

इन्जुरी समयमा मेक्सिकोका सिजार मोन्टेसले खुलिसो मुदाउलाई रोक्ने क्रममा फाउल गरेपछि उनलाई पनि सिधै रातो कार्ड देखाइयो। रातो कार्ड पाएका तीनै खेलाडी कम्तीमा एक खेलका लागि निलम्बित हुनेछन्। दक्षिण अफ्रिकाले आफ्नो अर्को खेलमा चेक गणतन्त्रको सामना गर्नेछ भने मेक्सिकोले ग्वाडालाहारामा दक्षिण कोरियासँग खेल्नेछ।

विश्वकप इतिहासमा सबैभन्दा चर्चित कार्डयुक्त खेल सन् २००६ मा जर्मनीको न्युरेम्बर्गमा भएको पोर्चुगल–नेदरल्यान्ड्स भिडन्तलाई मानिन्छ। उक्त खेलमा दुवै टोलीका दुई/दुई गरी चार खेलाडीलाई रातो कार्ड देखाइएको थियो भने कुल १६ वटा पहेँलो कार्ड देखाइएको थियो।

विश्वकप २०२६ को पहिलो खेलमै देखिएको अनुशासनहीनताले प्रतियोगिताको सुरुआतलाई नाटकीय बनाएको छ।