विश्वकप समूह ‘डी’ : घरेलु समर्थकको साथमा अमेरिका, टर्की, पाराग्वे र अस्ट्रेलियाबीच कडा प्रतिस्पर्धा

फिफा विश्वकप २०२६ को समूह ‘डी’ मा आयोजक राष्ट्र अमेरिका, टर्की, पाराग्वे र अस्ट्रेलिया छन्। यी चार टोलीबीचको प्रतिस्पर्धा निकै रोचक हुने अपेक्षा गरिएको छ। विशेषगरी अमेरिकाले गत वर्ष मैत्रीपूर्ण खेलहरूमा यी तीनै टोलीसँग खेलिसकेको अनुभव बोकेको छ।

अमेरिकाले गत वर्ष टर्कीसँग २–१ ले हार बेहोरेको थियो भने अस्ट्रेलिया र पाराग्वेलाई समान २–१ को नतिजाले पराजित गरेको थियो। समूह ‘डी’ का खेलहरू क्यानडाको भ्यानकुभर तथा अमेरिकाका सियाटल, सान्टा क्लारा (सान फ्रान्सिस्को नजिक) र इन्गलवुड (लस एन्जलस नजिक) मा आयोजना हुनेछन्।

यो समूह एउटै समय क्षेत्रभित्र खेलिने चार समूहहरूमध्ये एक हो।

१९८० दशकयताकै कमजोर अमेरिका

सह–आयोजक राष्ट्र अमेरिकाले विश्वकपमा शीर्ष वरीयता प्राप्त टोलीका रूपमा प्रवेश गरे पनि केही कमजोरीहरू देखिएका छन्। विशेषगरी गोलकिपिङ विभागलाई सन् १९८० दशकयताकै कमजोर मानिएको छ। साथै, शीर्ष युरोपेली लिगमा नियमित खेल्ने सेन्ट्रल डिफेन्डर क्रिस रिचर्ड्स मात्र टोलीका प्रमुख रक्षक हुन्।

फिफा वरीयतामा १६औं स्थानमा रहेको अमेरिकाले आफ्नो अभियान २७औं स्थानको अस्ट्रेलियाविरुद्ध सुरु गर्नेछ। त्यसपछि पाराग्वे (४०औं) र टर्की (२२औं) सँग खेल्नेछ।

टोलीका मुख्य स्टार क्रिस्टियन पुलिसिक पछिल्लो समय गोलको लयमा देखिएका छैनन्। उनले सन् २०२४ यता राष्ट्रिय टोलीका लागि गोल गर्न सकेका छैनन्।

मिडफिल्डर टायलर एडम्स र राइट ब्याक सर्जिनो डेस्ट पनि फिटनेस समस्यासँग जुधिरहेका छन्। यी दुवै खेलाडी २०२२ विश्वकपमा अन्तिम १६ सम्म पुगेको अमेरिकी टोलीका महत्त्वपूर्ण सदस्य थिए।

सन् १९३० को पहिलो विश्वकपपछि कुनै पनि अमेरिकी टोली सेमिफाइनलसम्म पुग्न सकेको छैन। अमेरिका अन्तिम पटक २००२ मा क्वार्टरफाइनल पुगेको थियो। २०२४ को कोपा अमेरिका प्रतियोगितामा समूह चरणबाटै बाहिरिएपछि प्रशिक्षक ग्रेग बर्हाल्टरको स्थानमा अर्जेन्टिनी प्रशिक्षक माउरिसियो पोचेटिनो नियुक्त भएका थिए।

लगातार पाँच विश्वकपमा छनोट हुन असफल टर्की

‘क्रेसेन्ट स्टार्स’ उपनामले परिचित टर्कीले २००२ को विश्वकप र २००८ को युरोपियन च्याम्पियनसिपमा सेमिफाइनलसम्मको यात्रा गरेको थियो। तर, त्यसपछि लगातार पाँच विश्वकपमा छनोट हुन असफल भएको टोली यसपटक पुनः विश्व फुटबलको सबैभन्दा ठूलो मञ्चमा फर्किएको छ।

कोसोभोविरुद्धको प्लेअफ जित्दै टर्कीले विश्वकपमा स्थान सुरक्षित गरेको हो। यो टर्कीको तेस्रो विश्वकप सहभागिता हुनेछ। टोली पहिलोपटक सन् १९५४ मा विश्वकपमा पुगेको थियो।

कप्तान हाकान चाल्हानोग्लुले राष्ट्रिय टोलीका लागि २२ गोल गरेका छन् भने केरम अक्तुर्कोग्लुले १५ गोल गरेका छन्। कोसोभोविरुद्धको निर्णायक खेलमा विजयी गोल पनि उनैले गरेका थिए।

सन् २०२३ मा स्टेफन कुन्ट्जको स्थानमा प्रशिक्षक बनेका भिन्सेन्जो मोन्टेलाले टोलीलाई युरो २०२४ को क्वार्टरफाइनलसम्म पुर्‍याएका थिए।

स्पेनलाई टक्कर दिएको पाराग्वे

पाराग्वेले इक्वेडरसँग गोलरहित बराबरी खेलेपछि दक्षिण अमेरिकाबाट प्राप्त अन्तिम स्वतः छनोट स्थान सुरक्षित गर्दै २०१० पछि पहिलोपटक विश्वकपमा पुनरागमन गरेको हो।

यो पाराग्वेको नवौं विश्वकप सहभागिता हुनेछ। टोलीको उत्कृष्ट उपलब्धि सन् २०१० मा क्वार्टरफाइनल पुग्नु हो, जहाँ स्पेनसँग १–० ले पराजित भएको थियो।

टोलीको आक्रमणको नेतृत्व अनुभवी मिगुएल अल्मिरोन (३२) र एन्टोनियो सानाब्रिया (३०) ले गर्नेछन्। यता २२ वर्षीय जुलियो एन्सिसो र २३ वर्षीय डिएगो गोमेज जस्ता युवा खेलाडीहरूले टोलीमा नयाँ ऊर्जा थपेका छन्।

कोपा अमेरिका २०२४ मा निराशाजनक प्रदर्शनपछि डानियल गार्नेरोको स्थानमा गुस्ताभो अल्फारोलाई मुख्य प्रशिक्षक नियुक्त गरिएको थियो।

समूह चरण पार गर्ने लक्ष्यमा अस्ट्रेलिया

लगातार चार विश्वकपमा समूह चरणबाटै बाहिरिएको अस्ट्रेलियाले २०२२ विश्वकपमा भने उत्कृष्ट प्रदर्शन गर्दै ट्युनिसिया र डेनमार्कलाई हराएर अन्तिम १६ मा स्थान बनाएको थियो। त्यसपछि टोली अर्जेन्टिनासँग २–१ ले पराजित हुँदै बाहिरिएको थियो। पछि अर्जेन्टिनाले नै उपाधि जितेको थियो।

टोलीका कप्तान तथा गोलकिपर म्याथ्यु रायन आफ्नो चौथो विश्वकप खेल्न तयार छन्। सन् २०२४ मा बहराइनसँग घरेलु मैदानमा हार र इन्डोनेसियासँग बराबरी खेलेपछि प्रशिक्षक ग्राहम अर्नोल्डले पद छाडेका थिए। त्यसपछि अस्ट्रेलियन पूर्वडिफेन्डर टोनी पोपोभिचलाई मुख्य प्रशिक्षक नियुक्त गरिएको थियो।

पोपोभिचको नेतृत्वमा अस्ट्रेलिया समूह चरण पार गर्ने लक्ष्यसहित मैदानमा उत्रिनेछ।

समूह ‘डी’ मा घरेलु समर्थकको साथ पाएको अमेरिका अगाडि बढ्ने प्रमुख दाबेदार मानिए पनि टर्की, पाराग्वे र अस्ट्रेलिया तीनै टोली प्रतिस्पर्धात्मक भएकाले यो समूह निकै रोमाञ्चक हुने अपेक्षा गरिएको छ।