ललितपुरसँग ‘प्रि सिजन’ खेल्न अस्ट्रेलियन ‘ए’ लिग क्लबको प्रस्ताव

काठमाडौं। ललितपुर सिटी एफसीसँग प्रि सिजनको खेल्न अस्ट्रेलियाको ‘ए’ लिग क्लब पर्थ ग्लोरी एफसीले प्रस्ताव पठाएको छ।

नेपाल सुपर लिगको दुई पटकको च्याम्पियन क्लब ललितपुर सिटी एफसीसँग प्रि सिजन खेल्न अस्ट्रेलियाको शीर्ष डिभिजनको क्लब पर्थ ग्लोरीले प्रस्ताव पठाएको हो। ‘एसियासँग सबैभन्दा नजिक रहेको अस्ट्रेलियाली राज्य पश्चिमी अस्ट्रेलियामा अवस्थित भएकाले यस क्षेत्रका क्लबसँग बलियो सम्बन्ध स्थापना गर्नु हाम्रो विशेष चासोको विषय हो,’ क्लबका सिईओ एन्थोनी राडिचले ललितपुरलाई पठाएको पत्रमा भनिएको छ।

क्लबको प्रि सिजन अवधि जुलाई १ देखि अक्टोबर ९ सम्म रहने र क्लबले विशेष रुपमा अगष्टको प्रारम्भिक चरण वा सेप्टेम्बर महिनामा मैत्रीपूर्ण खेलहरु आयोजना गर्न चाहेको पर्थ ग्लोरीले बताएको छ।

एनएसएलको चौथों संस्करण सेप्टेम्बर ५ अर्थात भदौ २० गतेबाट सुरु हुँदैछ। प्रतियोगिता पहिलो पटक चार महिनासम्म सञ्चालन हुनेछ। प्रतियोगिताका खेलहरू पहिलो पटक होम एण्ड अवे प्रणालीमा खेलाउने तयारी छ। चौथो सिजनमा तीन सहरलाई समावेश गरेर १० टिमको प्रतियोगिता सञ्चालन गर्ने आयोजकको तयारी छ।

प्रतिष्ठित व्यवसायीक घराना भाटभटेनी समूहको लगानी रहेको ललितपुरले अस्ट्रेलियन ए लिग क्लबबाट प्रि म्याच खेल्न प्रस्ताव आएको उल्लेख गर्दै यस विषयमा क्लब सकारात्मक रहेको बताएको छ। ‘प्रि सिजन गेमका लागि प्रस्ताव आएको छ। हामीपनि एनएसएलको तयारी राम्रो होस् भन्ने चाहन्छौं। उनीहरूपनि एनएसएल अघि ललितपुरसँग प्रि सिजन खेल्न चाहन्छन्। साथै नेपालको राष्ट्रिय फुटबल टिमसँग समेत उनीहरूको मैत्रीपूर्ण फुटबल खेल्ने इच्छा छ। यो हाम्रो देशको फुटबलका लागि राम्रो कुरा हो,’ ललितपुर क्लबका एक पदाधिकारीले खेलपाटीसँग भने।