७ वर्षपछि भारत साफ महिला च्याम्पिनसिपको फाइनलमा

काठमाडौं। भारत ७ वर्षपछि साफ महिला च्याम्पिनसिपको फाइनलमा प्रवेश गरेको छ।

बुधबार सम्पन्न दोस्रो सेमिफाइनलमा भुटानलाई १–० ले हराउँदै भारत उपाधिनजिक पुगेको हो।

भारतको जितमा सान्फिदा नोन्ग्रमले ५८औं मिनेटमा गरेको गोल नै निर्णायक बन्यो। योसँगै भारतले उपाधिका लागि साबिक विजेता बंगलादेशसँग खेल्ने भएको छ।

बुधबार नै सम्पन्न पहिलो सेमिफाइनलमा बंगलादेशले साबिक उपविजेता नेपालाई २–१ ले पराजित गरेको थियो।

योसँगै बंगलादेश ह्याट्रिक उपाधितर्फ लम्किएको छ। बंगलादेशले २०२२ र २०२४ मा नेपाललाई हराउँदै लगातार उपाधि जितेको थियो।

यद्यपि, यसपल्ट भने बंगालदेशले भारतको चुनौतीलाई पन्छाउनुपर्नेछ। यी दुई टोली समूह चरणमा पनि भिडेका थिए।

तर, उक्त भेटमा भारतले ३–० को सहज जित निकालेको थियो। यद्यपि, फाइनलमा भने यी दुई १० वर्षपछि भिड्न लागेका हुन्।

२०१६ को फाइनलमा भारतले बंगलादेशलाई ३–१ ले हराउँदै उपाधि हात पारेको थियो। २०१९ को संस्करणमा नेपाललाई ३–१ ले हराउँदै पाँचौंपल्ट उपाधि जितेको भारतलाई त्यसयताका दुई संस्करणका सेमिफाइनलमा नेपालले नै रोकेको थियो।