स्पेन र उरुग्वे समूह ‘एच’ का प्रतिस्पर्धी

युरोपियन च्याम्पियन स्पेन र दक्षिण अमेरिकी फुटबल शक्तिराष्ट्र उरुग्वे २०२६ विश्वकपको समूह ‘एच’ का मुख्य आकर्षण हुन्। यस समूहमा साउदी अरेबिया र पहिलो पटक विश्वकपमा पुगेको सानो अफ्रिकी राष्ट्र केप भर्डे पनि छन्।

समूहको सबैभन्दा चर्चित खेल जुन २६ मा मेक्सिकोको ग्वाडालाजारामा स्पेन र उरुग्वेबीच हुनेछ। यी दुई पूर्वविश्व च्याम्पियन राष्ट्रबीच विश्वकपमा यसअघि दुई पटक भेट भएको थियो र दुवै खेल बराबरीमा टुंगिएका थिए।

समूहका दुई खेल एटलान्टामा हुनेछन्, जसमा स्पेन सहभागी हुनेछ। उरुग्वेका दुई खेल मियामीमा हुनेछन् भने केप भर्डे र साउदी अरेबियाबीचको खेल ह्युस्टनमा हुनेछ।

स्पेन

स्पेनले २०२२ विश्वकपमा मोरक्कोसँग अन्तिम १६ मा हार बेहोरेपछि पुनरागमन गर्दै २०२४ को युरोपियन च्याम्पियनसिप जितेको थियो। ‘ला रोजा’ ले २०२३ नेसन्स लिगको उपाधि पनि जित्यो भने २०२५ मा पोर्चुगलसँग फाइनल हार्दै उपविजेता बनेको थियो।

सन् २०१० मा एकमात्र विश्वकप उपाधि जितेपछि स्पेनले विश्वकपमा अन्तिम १६ भन्दा माथिको यात्रा गर्न सकेको छैन। २०२२ विश्वकपपछि लुइस एनरिकेले पद छाडेपछि पूर्वयुवा टोली प्रशिक्षक लुइस डे ला फुएन्तेले टोली सम्हालिरहेका छन्।

स्पेनको नेतृत्व बार्सिलोनाका तीन युवा स्टारले गर्ने अपेक्षा गरिएको छ। १८ वर्षीय लामिन यमलले पहिलो विश्वकप खेल्नेछन्। १९ वर्षीय पाउ कुबार्सी रक्षापंक्तिको प्रमुख आधार हुनेछन् भने मिडफिल्डमा पेड्रीले टोलीको खेल सञ्चालन गर्नेछन्। घुँडाको चोटबाट फर्किएका म्यानचेस्टर सिटीका रोड्री पनि टोलीका महत्त्वपूर्ण खेलाडी रहनेछन्।

केप भर्डे

करिब पाँच लाख जनसंख्या भएको केप भर्डे विश्वकपमा छनोट हुने इतिहासकै तेस्रो सबैभन्दा सानो राष्ट्र बनेको छ। यसअघि आइसल्यान्ड र कुरासाओले यो उपलब्धि हासिल गरेका थिए।

अफ्रिकाको पश्चिमी तटनजिक रहेका १० ज्वालामुखी टापुको यो राष्ट्रले क्यामरुन र अंगोलाजस्ता बलिया टोली रहेको समूहबाट विश्वकपमा स्थान बनाएको हो। छनोटका क्रममा घरेलु मैदानमा खेलेका पाँचवटै खेल जित्दै उसले एक गोल पनि खाएको थिएन।

सन् २०२० देखि टोलीको प्रशिक्षक पेड्रो लेइताओ ब्रिटो अर्थात् ‘बुबिस्ता’ हुन्। उनी राष्ट्रिय टोलीका पूर्वकप्तान समेत हुन्।

साउदी अरेबिया

साउदी अरेबियाले लगातार तेस्रो विश्वकप खेल्दैछ। २०२२ को कतार विश्वकपमा उसले समूह चरणमा अर्जेन्टिनालाई २–१ ले हराएर विश्व फुटबललाई चकित बनाएको थियो।

क्रिस्टियानो रोनाल्डो, करिम बेन्जेमा लगायतका स्टार खेलाडीलाई घरेलु लिगमा भित्र्याएपछि साउदी फुटबलको स्तर पनि उकासिएको मानिन्छ।

फ्रान्सेली प्रशिक्षक हेर्भे रेनार्डको नेतृत्वमा रहेको टोलीले १९९४ को विश्वकपमा अन्तिम १६ सम्म पुग्दै आफ्नो उत्कृष्ट प्रदर्शन गरेको थियो। त्यसयता भने साउदी अरेबिया समूह चरण पार गर्न सफल भएको छैन।

साउदी अरेबियाले २०३४ को विश्वकप आयोजना गर्नेछ।

उरुग्वे

दुई पटकको विश्व च्याम्पियन उरुग्वे दक्षिण अमेरिकी छनोटमा अर्जेन्टिना, इक्वेडर र कोलम्बियापछि चौथो स्थानमा रह्यो। उसले पाँच पटकको विश्वकप विजेता ब्राजिललाई समेत पछि पारेको थियो।

उरुग्वे २०२२ विश्वकपमा समूह चरणबाटै बाहिरिएको थियो। यसअघि २०१८ मा क्वार्टरफाइनल र २०१० मा सेमिफाइनलसम्म पुगेको थियो।

सन् २०२३ देखि अनुभवी अर्जेन्टिनी प्रशिक्षक मार्सेलो बिएल्सा टोलीको जिम्मेवारीमा छन्। तर, हालैका मैत्रीपूर्ण खेलमा कमजोर प्रदर्शन गरेपछि उनको आलोचना भइरहेको छ। नोभेम्बरमा अमेरिकासँग ५–१ को हार बेहोरेको उरुग्वेले पछिल्ला चार खेलमा जित निकाल्न सकेको छैन।

टोलीका प्रमुख खेलाडीमा रियल मड्रिडका मिडफिल्डर फेडेरिको भाल्भेर्डे, बार्सिलोनाका डिफेन्डर रोनाल्ड अराउहो र म्यानचेस्टर युनाइटेडका मिडफिल्डर मानुएल उगार्ते रहेका छन्।