अब्बल बार्सिलोना

काठमाडौं। स्पेनी क्लब बार्सिलोनाले शनिबार महिला च्याम्पियन्स लिगको फाइनलमा ओएल लियोनेसलाई ४–० ले पराजित गर्दै चौथो युरोपेली उपाधि जितेको छ।

फरवार्ड इभा पायोर र साल्मा पारालुएलोले दोस्रो हाफमा समान दुई–दुई गोल गरेपछि टोलीले उपाधि हात पारेको हो।

पहिलो हाफमा बार्सिलोनाले निकै दबाब खेप्नुपरेको थियो। लियोनेसले गरेको एक गोल भिडियो सहायक रेफ्रीको निर्णयपछि अफसाइड ठहर भएको थियो भने पायोरले पाएका केही अवसर पनि सदुपयोग हुन सकेका थिएनन्। तर, दोस्रो हाफमा बार्सिलोनाले उत्कृष्ट खेल प्रदर्शन गर्दै सहज जित निकालेको हो।

खेलको १४औं मिनेटमा लिन्ड्से हिप्सले बल जाली चुमाए पनि वेन्डी रेनार्डको हेडर गोलरक्षक काता कोलबाट छुटेपछि बनेको उक्त गोल भिडियो समीक्षा पछि अफसाइड घोषित गरिएको थियो।

त्यसपछि पनि लियोनेसले पहिलो हाफभर खेलमा नियन्त्रण कायम राखेको थियो। सामान्यतया बल नियन्त्रणमा हाबी रहने बार्सिलोना यसपटक बल फिर्ता जित्न संघर्षरत देखिएको थियो।

आठ पटकको च्याम्पियन फ्रान्सेली क्लब लियोनेसले बार्सिलोनाको रक्षापंक्तिपछाडि खाली स्थान खोज्ने प्रयास गरिरहे पनि लक्ष्यमा प्रभावकारी प्रहार गर्न सकेनन्। त्यसको मूल्य दोस्रो हाफमा चुकाउनुपर्‍यो।

बार्सिलोनाले ५५औं मिनेटमा अग्रता लियो। पात्री गुइहारोले आफ्नै क्षेत्रबाट बल जितेर अघि बढिन् र दायाँपट्टि रहेकी इभा पायोरलाई पास दिइन्। पायोरले कठिन कोणबाट उत्कृष्ट गोल गर्दै टोलीलाई अग्रता दिलाइन्।

२९ वर्षीया पोलिस खेलाडी पायोरले १४ मिनेटपछि दोस्रो गोल थपिन्। लियोनेसको रक्षापंक्ति असावधान बनेको मौका छोप्दै उनले एस्मी ब्रुग्ट्सको पासलाई नजिकबाट शक्तिशाली प्रहारमार्फत गोलमा परिणत गरिन्।

दोस्रो गोलपछि लियोनेसको आत्मविश्वास कमजोर बन्यो। पहिलो हाफमा बल नियन्त्रणमा हाबी देखिएको टोली त्यसपछि प्रभावहीन बन्न पुग्यो। साल्मा पारालुएलोले ९०औं मिनेटमा टाढाबाट सानदार प्रहार गर्दै तेस्रो गोल गरिन्। त्यसको तीन मिनेटपछि तीव्र प्रतिआक्रमणमा अर्को गोल थप्दै उनले बार्सिलोनाको शानदार दोस्रो हाफ प्रदर्शनलाई पूर्णता दिइन्।

खेल सकिनुअघि नै बार्सिलोनाका समर्थकहरूले ‘क्याम्पेओनेस!’ भन्दै च्याम्पियनको नाराबाजी सुरु गरेका थिए। खेल सकिएलगत्तै खेलाडीहरू समर्थकहरूसँग उत्सव मनाउन पुगेका थिए।

बार्सिलोनाकी विङ्गर क्यारोलिन ग्राहम हान्सेनका लागि यो जित विशेष भावनात्मक बनेको थियो। फाइनल भएको उल्भाल रंगशालाबाट केही सय मिटर दूरीमा हुर्किएकी उनले घरेलु मैदानमै उपाधि जित्न पाउँदा विशेष अनुभूति भएको बताइन्।

उनले भनिन्, ‘पूरै सिजन धेरै उतारचढाव भए। आफ्नै घरमा, बार्सिलोनाका यति धेरै समर्थकसामु उपाधि जित्नु अत्यन्त विशेष हो। यही मैदानमा म हुर्किएकी हुँ, यहाँको प्रत्येक घाँस चिन्छु। आज टोलीसँग उत्सव मनाउन आतुर छु।’

उनकी नर्वेजियन टोलीसहकर्मी आडा हेगरबेर्ग भने पराजयपछि निराश देखिइन्। लियोनेस नवौँ उपाधि जित्ने अवसरबाट वञ्चित भएको थियो।

हेगरबेर्गले भनिन्, ‘आज हाम्रो दिन थिएन। हामीले उनीहरूको रक्षापंक्तिपछाडिको खाली स्थान उपयोग गर्न सकेनौँ। यस्ता खेल कठिन हुन्छन्। वर्षौँदेखि धेरै सफलता पाएका छौँ, त्यसैले हार हुँदा टाउको झुकाएर बस्नु हुँदैन।’