आरआई एफसी सेमिफाइनलमा

पथरी।​ सिराहामा जारी सहिद हेमनारायण गोल्डकपमा आरआई एफसी काठमाडौं प्रतियोगिताको सेमिफाइनलमा प्रवेश गरेको छ।

शनिबार भएको दोस्रो क्वार्टरफाइनल खेलमा काठमाडौंले पथरी-११ फुटबल क्लब, मोरङलाई ४–१ को फराकिलो गोलअन्तरले पराजित गर्दै अन्तिम चारमा आफ्नो स्थान सुरक्षित गरेको हो।

खेल अवधिभर आक्रामक रणनीति अपनाएको काठमाडौंका लागि निसकुमार श्रेष्ठ र सिजल राईले गोल गरे भने पथरीका तर्फबाट सञ्जय लिम्बूले एक सान्त्वना गोल फर्काए।

३६औं मिनेटमा काठमाडौंका सिजलले गोल गर्दै टिमलाई सुरुआती अग्रता दिलाए।​३९औं मिनेटमा काठमाडौं कै निसले व्यक्तिगत पहिलो र टिमका लागि दोस्रो गोल गरे ।

​४४औं मिनेटमा पथरी–११ का सञ्जयले गोल गर्दै खेललाई २–१ को स्थितिमा ल्याए र खेलमा फर्किने प्रयास गरे। तर, ७७औं मिनेटमा काठमाडौंका निसले पुनः गोल गर्दै टिमको अग्रता ३–१ बनाए।

८५औं मिनेटमा निसले आफ्नो ह्याट्रिक पूरा गर्दै काठमाडौंलाई ४–१ को सानदार जित दिलाए।​खेलमा उत्कृष्ट प्रदर्शन गर्दै सानदार ह्याट्रिक गर्न सफल काठमाडौंका अग्रपंक्तिका खेलाडी निस घोषित भए। उनले नगद तीन हजार र ट्रफी प्राप्त गरे।

प्रतियोगिता अन्तर्गत आइतबारको तेस्रो क्वार्टरफाइनल खेल गोल्डेन स्टार यूथ क्लब, भलुवा (सुनसरी) र गाईघाट युनाइटेड (उदयपुर) बीच प्रतिस्पर्धा हुनेछ।