युरोपा लिगको ‘राजा’ अर्थात उनाइ एमेरी

काठमाडौं। इङ्ल्यान्डका भावी राजा प्रिन्स विलियमको उपस्थितिमा उनाइ एमेरीले फेरि एकपटक आफूलाई युरोपा लिगको ‘राजा’ साबित गरेका छन्।

इस्तानबुलमा बुधबार राति भएको फाइनलमा एस्टन भिल्लाले फ्राइबर्गलाई ३–० ले हराउँदै युरोपा लिग उपाधि जित्यो। यससँगै प्रशिक्षक एमेरीले यो प्रतियोगितामा आफ्नो कीर्तिमानी पाँचौं उपाधि जित्न सफल भए।

टुप्रास स्टेडियममा एस्टन भिल्लाको ऐतिहासिक जितपछि क्लबका आजीवन समर्थक प्रिन्स विलियम उत्साहका साथ खुसी मनाइरहेका देखिन्थे। उनले कप्तान जोन म्याकगिनले ट्रफी उचाल्दा मोबाइलबाट तस्बिरसमेत खिचेका थिए।

खेलपछि प्रिन्स विलियमले सामाजिक सञ्जाल एक्समा लेखेका छन्, ‘अविश्वसनीय रात! सबै खेलाडी, टोली, प्रशिक्षक र क्लबसँग जोडिएका सबैलाई धेरै बधाई।’ कप्तान म्याकगिनले भने, ‘उहाँ निकै सरल व्यक्ति हुनुहुन्छ। खेलअघि ड्रेसिङ रुममा आउनुभएको थियो। उहाँ ठूलो भिल्ला समर्थक भएकाले यस्तो अवसर गुमाउने कुरा नै थिएन।’

यो एस्टन भिल्लाको ३० वर्षपछि पहिलो ठूलो उपाधि हो। यसअघि टोलीले सन् १९९६ मा इङ्लिस लिग कप जितेको थियो। युरोपियन स्तरमा भने क्लबले सन् १९८२ मा युरोपियन कप र सुपर कप जितेको थियो।

उनाइ एमेरीको युरोपा लिगमा सफलता भने पुरानै कथा हो। उनले सन् २०१४ देखि २०१६ सम्म लगातार तीन पटक सेभियालाई यो उपाधि जिताएका थिए भने २०२१ मा भिल्लारियललाई पनि च्याम्पियन बनाएका थिए। अब उनले ‘भिल्ला’ नाम भएको अर्को क्लब एस्टन भिल्लालाई पनि उपाधि दिलाएका छन्।

एमेरीले भने,‘म युरोपियन प्रतियोगिताप्रति सधैं आभारी छु। चाहे च्याम्पियन्स लिग होस्, कन्फरेन्स लिग होस् वा युरोपा लिग। विशेषगरी युरोपा लिग मेरो लागि विशेष छ। हामीले यो प्रतियोगितामा अत्यन्त संघर्ष गर्‍यौं र गम्भीरतापूर्वक खेल्यौं।’

पहिलो हाफमै युरी टिलेमान्स र एमिलियानो बुएन्डियाले उत्कृष्ट गोल गर्दै भिल्लालाई २–० को अग्रता दिलाएका थिए। दोस्रो हाफमा मोर्गन रोजर्सले थप एक गोल गरेपछि फ्राइबर्ग पूर्ण रूपमा दबाबमा परेको थियो।

१० वर्षअघि जर्मनीको दोस्रो डिभिजनमा रहेको फ्राइबर्ग पहिलो युरोपियन फाइनलमा अनुभवहीन देखियो। एस्टन भिल्ला स्वयं पनि सन् २०१९ सम्म इङ्ल्यान्डको दोस्रो डिभिजनमा थियो।

तर, २०२२ मा एमेरी प्रशिक्षक बनेपछि क्लबको रूपान्तरण चमत्कारिक बन्यो। त्यसबेला रेलिगेसन क्षेत्रभन्दा एक स्थान माथि रहेको टोली अहिले लगातार दोस्रो सिजन च्याम्पियन्स लिगमा छनोट हुन सफल भएको छ।

म्याकगिनले भने, ‘यो प्रशिक्षक हुँदा केही पनि असम्भव छैन। आजको रात हामीले वर्षौंदेखि बनाएको यात्राको परिणाम हो। ३–० भएपछि हामी युरोपियन च्याम्पियन भयौं भन्ने अनुभूति शब्दमा व्यक्त गर्न सकिँदैन। यो मेरो करिअरकै सबैभन्दा गर्विलो क्षण हो।’

४१औं मिनेटमा मोर्गन रोजर्सको क्रसमा युरी टिलेमान्सले शानदार भली गोल गर्दै भिल्लालाई अग्रता दिलाएका थिए। त्यसपछि पहिलो हाफको अतिरिक्त समयमा बुएन्डियाले बक्स बाहिरबाट घुमाउरो प्रहार गर्दै उत्कृष्ट गोल गरे।

५८औं मिनेटमा बुएन्डियाकै क्रसलाई मोर्गन रोजर्सले नजिकको पोस्टमा स्लाइड गर्दै गोलमा परिणत गरेपछि खेल पूर्ण रूपमा भिल्लाको नियन्त्रणमा पुगेको थियो। टिलेमान्सले भने, ‘हामीले उत्कृष्ट सिजन बितायौं र त्यसलाई उपाधिसहित अन्त्य गर्नु अविश्वसनीय अनुभूति हो।’

यो जित एमेरीका लागि व्यक्तिगत रूपमा पनि विशेष रह्यो। २०१९ मा उनले आर्सनललाई युरोपा लिग फाइनलसम्म पुर्‍याए पनि चेल्सीसँग हार बेहोरेपछि केही महिनामै बर्खास्त भएका थिए।

अब भने उनले फ्रान्समा पेरिस सेन्ट-जर्मेनसँग घरेलु लिग जितेपछि स्पेन र इङ्ल्यान्डका क्लबहरूसँग पनि युरोपियन सफलता हासिल गर्दै आफूलाई आधुनिक फुटबलका सफल प्रशिक्षकमध्ये एकका रूपमा स्थापित गरेका छन्।