फेरि च्याम्पियन्स लिगमा फर्कियो युनाइटेड

काठमाडौं। इङ्ल्यान्डको प्रसिद्ध क्लब म्यानचेस्टर युनाइटेड फेरि युरोपको शीर्ष क्लब प्रतियोगिता च्याम्पियन्स लिगमा फर्किएको छ।

आइतबार लिभरपुलविरुद्ध ३–२ को जित निकाल्दै युनाइटेडले दुई वर्षपछि उक्त प्रतियोगितामा स्थान सुनिश्चित गरेको हो। ओल्ड ट्राफोर्डमा भएको रोमाञ्चक खेलमा कोबी माइनुले पेनाल्टी क्षेत्र बाहिरबाट पहिलो टचमै गरेको प्रहार गोलमा परिणत गर्दै निर्णायक भूमिका खेले।

डिफेन्डिङ च्याम्पियन लिभरपुलले दुई गोलले पछि परेपछि खेल बराबरीमा ल्याए पनि अन्ततः युनाइटेडले जित हात पार्‍यो। मुख्य प्रशिक्षक माइकल क्यारिकले जनवरीमा जिम्मेवारी सम्हालेपछि टोलीलाई उत्कृष्ट प्रदर्शन गराउँदै लिग तालिकाको तेस्रो स्थानमा पुर्‍याएका छन्।

उनले आर्सनल, म्यानचेस्टर सिटी र लिभरपुलजस्ता ठूला टोलीविरुद्ध महत्त्वपूर्ण जित दिलाएका छन्। युनाइटेडका फरवार्ड माटेउस कुन्हाले क्यारिकको प्रशंसा गर्दै उनलाई क्लबका महान् पूर्वप्रशिक्षक एलेक्स फर्गुसनसँग तुलना गरेका छन्। फर्गुसन खेल हेर्न रंगशालामा आउने योजनामा थिए। तर, अस्वस्थ महसुस गरेपछि खेल सुरु हुनुअघि अस्पताल गएका थिए।

यस जितसँगै युनाइटेडले आफ्नो कट्टर प्रतिद्वन्द्वी लिभरपुलविरुद्ध घरेलु र ‘अवे’ दुवै खेल जित्दै २०१५–१६ पछि पहिलो पटक लिग डबल पूरा गरेको छ। हाल युनाइटेड चौथो स्थानमा रहेको लिभरपुलभन्दा ६ अंकले अघि छ। यद्यपि, सिजनका तीन खेल बाँकी छन्।

क्यारिकको प्रशिक्षणमा युनाइटेडले १४ खेलबाट ३२ अंक जोडेको छ। यो यस अवधिमा सबैभन्दा बढी अंक हो। क्लबले उनलाई सिजनको अन्त्यसम्मका लागि मात्र नियुक्त गरेको हो। तर, उत्कृष्ट प्रदर्शनले उनलाई स्थायी प्रशिक्षक बनाउने माग बढेको छ।

खेलमा युनाइटेडले उत्कृष्ट सुरुआत गर्दै छैटौं मिनेटमा माटेउस कुन्हाको गोलबाट अग्रता लियो। १४औं मिनेटमा बेन्जामिन सेस्कोले दोस्रो गोल थपे। तर, दोस्रो हाफमा डोमिनिक सोबोस्लाइ र कोडी गाक्पोले गोल गर्दै लिभरपुललाई बराबरीमा ल्याए। त्यसपछि माइनुको निर्णायक गोलले युनाइटेडलाई जित दिलायो।

यस हारसँगै लिभरपुल अर्को सिजन च्याम्पियन्स लिगमा स्थान पक्का गर्नबाट चुकेको छ। टोलीले अझै केही खेलको नतिजा कुर्नुपर्नेछ। टोलीका कप्तान भर्जिल भान डाइकले यस सिजनको प्रदर्शन अपेक्षाभन्दा कमजोर भएको स्वीकार गर्दै आगामी सिजनमा सुधार आवश्यक रहेको बताएका छन्।