जावलाखेलको दोस्रो जित

काठमाडौं। जावलाखेल युथ क्लबले राष्ट्रिय लिगमा दोस्रो जित हात पारेको छ।

त्रिपुरेश्वरस्थित दशरथ रंगशालामा मंगलबार सम्पन्न खेलमा जावलाखेलले नव जनजागृति युवा क्लबलाई ४–० को फराकिलो अन्तरले पराजित गरेको हो।

लिगमा ५ खेल खेलेको जावलाखेलले ६ अंक जोडेको छ। समान खेलमा जनजागृति अंकविहीन बन्दै तालिकाको पुच्छरमा छ।

खेलको आठौं मिनेटमा हरिशराज भट्टले सानदार गोल गर्दै जावलाखेललाई सुरूआती अग्रता दिलाए। त्यसको दुई मिनेटपछि जनजागृतिका खेलाडीले जावलाखेलका बौबकार सिस्सोखोलाई पेनाल्टी बक्स भित्र लडाएका थिए। त्यसपछि उनले पेनाल्टी पाए।

सिस्सोखोले पेनाल्टीमार्फत गोल गर्दै जावलाखेलको अग्रता दोब्बर बनाए। ४३औं मिनेटमा धर्मेन्द्र कुँवरको पासमा युवराज ढकालले गोल गर्दै जावलाखेललाई ३–० अग्रता दिलाए। ५०औं मिनेटमा जनजागृतिका उमेश सञ्जलले पेनाल्टी भित्रबाट गरेको प्रहारलाई जावलाखेलका गोलकिपर उनेश चौधरीले उत्कृष्ट बचाउ गरे।

६८औं मिनेटमा जावलाखेलका विकास दर्लामी मगरले दिएको पासमा पुष्कर खड्काले गरेको प्रहारले लक्ष्य लिन सकेन। निर्धारित समय सकिन ५ मिनेट बाँकी रहँदा धर्मेन्द्रले गोल गर्दै जावलाखेललाई ४–० को एकपक्षीय जित दिलाए।