अल–नासरसँग दूरी घटाउँदै अल–हिलाल

काठमाडौं। साउदी प्रो–लिगको बहुप्रतिक्षित भिडन्तमा अल–हिलालले घरेलु मैदानमा अल–अहलीसँग गोलरहित बराबरीमा चित्त बुझाउनुपरेको छ।

सोमबार भएको यस खेलसँगै अल–हिलालले पछिल्ला खेलहरूमा अंक गुमाउने क्रमलाई निरन्तरता दिएको छ। यो अल–हिलालको लगातार तेस्रो बराबरी हो। यद्यपि, टोली ४७ अंकसहित तालिकाको शीर्ष स्थानमै कायम छ।

तर, दोस्रो स्थानको अल–नासरमाथिको अग्रता घटेर मात्र एक अंकमा सीमित भएको छ। तेस्रो स्थानको अल–अहली अल–हिलालभन्दा तीन अंक पछाडि छ।

खेलको २१औं मिनेटमा सेर्गेई मिलिन्कोभिच–साभिचले फ्रिकिकमार्फत अग्रता दिलाउने नजिक पुगेका थिए। तर, उनको कर्लिङ प्रहार क्रसबारमाथिबाट बाहिर गयो।

अल–अहलीले खुला ठाउँबाट खासै अवसर सिर्जना गर्न नसके पनि ७६औं मिनेटमा कर्नरबाट रोजर इबान्येजले हेडरमार्फत लगभग अग्रता लिने अवस्था बनेको थियो। तर, बल पोस्टबाट अलिकति बाहिर गयो।

खेलको अन्तिम क्षणतिर सालिम अल–दावसारीले अल–हिलालका लागि निर्णायक गोल गरेका थिए। तर, भीएआर समीक्षापछि बिल्डअपमा माल्कम अफसाइडमा रहेको पुष्टि भएपछि गोल अमान्य गरियो।

इन्जुरी समयमा अल–अहलीका अली माजराशी रातो कार्ड पाउँदै मैदान बाहिरिएर टोली १० खेलाडीमा सीमित भएको थियो। तर, अल–अहलीले मजबुत रक्षात्मक खेल प्रदर्शन गर्दै उपाधि होडमा महत्त्वपूर्ण एक अंक सुरक्षित गर्‍यो।