एमबाप्पे फेरि निर्णायक

काठमाडौं। किलियन एमबाप्पेले फेरि एकपटक निर्णायक भूमिका खेलेका छन्।

दोस्रो हाफको इन्जुरी समयमा उनले पेनाल्टी गोल गरेपछि रियल मड्रिडले रायो भायेकानोविरुद्ध २–१ को रोमाञ्चक जित निकालेको छ।

आइतबार सान्टियागो बेर्नाबेउमा भएको यस जितसँगै मड्रिड स्पेनिस ला लिगामा शीर्ष स्थानमा रहेको बार्सिलोनासँग एक अंकको दूरीमा पुगेको छ।

रियलका लागि भिनिसियस जुनियरले पनि गोल गरे। खेलको सुरुआतमा घरेलु समर्थकबाट हुटिङ खेपेका भिनिसियसले १५औं मिनेटमा दुई डिफेन्डरलाई छल्दै सानदार कर्लिङ सटमार्फत गोल गरेका थिए।

लाइनअप घोषणा हुँदा हुटिङमा परेका जुड बेलिङ्घम भने खेलको १०औं मिनेटमै बायाँ ह्यामस्ट्रिङ चोटका कारण मैदान छोड्न बाध्य भए। रियल च्याम्पियन्स लिगमा बेनफिकासँग ४–२ ले पराजित हुँदै अन्तिम १६ मा सिधै जाने अवसर गुमाएर आएको थियो।

अब टोलीले प्लेअफ चरणमा फेरि बेनफिकाको सामना गर्नेछ। खेलपछि रियलका मिडफिल्डर फेडेरिको भाल्भेर्डेले भने,‘च्याम्पियन्स लिगमा बेहोरेको हार निकै पीडादायी थियो। आज हामी त्यो छवि परिवर्तन गर्न चाहन्थ्यौं र मलाई लाग्छ हामीले उत्कृष्ट खेल देखायौं।’

बेर्नाबेउमा भएको खेल निकै तनावपूर्ण रह्यो। एमबाप्पेले इन्जुरी समयको १०औं मिनेटमा पेनाल्टीलाई सहज रूपमा गोलमा परिणत गर्दै टोलीलाई जित दिलाए। यो पछिल्ला पाँच खेलमा उनको आठौं गोल हो।

रायो भायेकानोले ४९औं मिनेटमा जोर्जे दे फ्रुटोसको गोलमार्फत बराबरी गरेको थियो। तर, ८०औं मिनेटपछि पाथे सिसलाई फाउलका कारण सिधै रातो कार्ड देखाइएपछि रायो १० खेलाडीमा सीमित भयो। अतिरिक्त समयमा पेप चाभार्रियाले दोस्रो पहेंलो कार्ड पाएर मैदान छोडे।

गत महिना जाबी अलोन्सोलाई प्रतिस्थापन गर्दै प्रशिक्षक बनेका आल्भारो अर्बेलोआको टोलीले यस जितसँगै बार्सिलोनासँगको प्रतिस्पर्धा कायम राखेको छ।

लगातार चार खेल हारिसकेको रायो भायेकानो १७औं स्थानमा झरेको छ, जुन रेलिगेसन क्षेत्रको ठीक बाहिर हो।