मच्छिन्द्रको लगातार चौथो जित

काठमाडौं। मच्छिन्द्र फुटबल क्लबले राष्ट्रिय लिगमा लगातार चौथो जित निकालेको छ।

सातदोबाटोस्थित एन्फा कम्प्लेक्समा बुधबार सम्पन्न खेलमा मच्छिन्द्रले चित्लाङ फुटबल क्लबलाई ३–१ ले पराजित गरेको हो। जितसँगै मच्छिन्द्रले चार खेलबाट १२ अंक पुर्‍याएको छ। समान खेलबाट चित्लाङको ४ अंक छ।

खेलको ३०औं मिनेटमा प्रदीप बुढाथोकीले गोल गर्दै मच्छिन्द्रलाई अग्रता दिलाए। पहिलो हाफको समाप्तितिर ४५औं मिनेटमा जोनाथन जोरिल्लाले दोस्रो गोल थपे। दोस्रो हाफमा पनि मच्छिन्द्रको दबाब कायम रहँदा ६९औं मिनेटमा अलिजोन अलिजोनोभले तेस्रो गोल गर्दै जित सुनिश्चित गरे।

चित्लाङका विज्ञान खड्काले ७०औं मिनेटमा सान्त्वना गोल फर्काए पनि खेलको नतिजा बदल्न भने सकेनन्।