एन्फा निर्वाचन स्थगित

काठमाडौं। आसन्न अखिल नेपाल फुटबल संघ (एन्फा)को निर्वाचन स्थगित भएको छ।

एन्फा निर्वाचन समितिको निर्णयअनुसार तत्कालका लागि निर्वाचन स्थगित गर्ने निर्णय गरेको हो। एन्फा प्रवक्ता सुरेश शाहले पनि सो कुरालाई पुष्टि गरे। ‘निर्वाचन समितिले मलाई जानकारी दिएअनुसार कार्यतालिका स्थगित गरेको छ,’ उनले खेलपाटीसँग भने।

पुस १६ गते बसेको एन्फा कार्यसमितिको बैठकले आगामी माघ २८ गते साधारण सभा र अग्रिम निर्वाचन गर्ने निर्णय गर्दै बहुमतले पारित गरेको थियो।

लगत्तै विधानविपरित निर्वाचन तय भएको भन्दै एन्फाकै अर्का उपाध्यक्ष विराटजंग शाही र सदस्य रुपेश अधिकारी राष्ट्रिय खेलकुद परिषद् (राखेप) गुहार्न पुगेका थिए।

राखेपले विधान संशोधनसहित जिल्ला तहको निर्वाचन गरेर मात्र केन्द्रीय निर्वाचन गर्न भन्दै ११ बुँदासहित एन्फालाई निर्देशन दिएको थियो।

तर, उक्त निर्देशनलाई लत्याउँदै निर्वाचन कार्यतालिका सार्वजनिक गरेको थियो। त्यसपछि गोरखाका अमित खत्रीले राखेप र एन्फालाई नै विपक्षी बनाएर उच्च अदालत पाटनमा रिट दायर गरेका थिए।

उच्च अदालतले निर्वाचन प्रक्रिया तत्काल अघि नबढाउन पुस २८ गते अल्पकालीन अन्तरिम आदेश जारी गर्दै अन्तरिम आदेश दिनुपर्ने हो वा होइन भन्ने छलफल गर्न माघ ६ गतेका लागि दुवै पक्षलाई बोलाएको थियो तर, त्यसअघि अर्थात माघ ३ गते नै आसन्न निर्वाचनका लागि पंकज विक्रम नेम्वाङ र दिर्घबहादुर केसी (कुमार) ले अध्यक्षमा उम्मेदवारी दिइसकेका थिए। अन्यले पनि उम्मेदवारी दिइसकेका छन्।

मंगलबार एन्फा मंगलबार भ्याकेट निवेदन लिएर अदालत पुगेको थियो। तर, अदालतले पहिला लिखित जवाफ पेश गर्न भन्दै भ्याकेट निवेदन दर्ता गर्न अस्वीकार गरेको थियो। अदालतले दुवै पक्षलाई पुन: माघ ११ गते छलफलमा बोलाएको छ। यसैबीच निर्वाचनको कार्यतालिका स्थगित गर्ने निर्णय गरिएको हो।