मच्छिन्द्र फर्किए प्रवेश

काठमाडौ। लगातार दुईपल्ट ‘ए’ डिभिजन लिग जिताएका प्रशिक्षक प्रवेश कटुवाललाई मच्छिन्द्रले क्लबमा फर्काएको छ।

आगामी राष्ट्रिय लिगका लागि उनलाई मुख्य प्रशिक्षकमा नियुक्त गरेको क्लबले जनाएको छ। यसअघि कटुवालको नेतृत्वमा मच्छिन्द्र नेपाली घरेलु फुटबलको शीर्ष टोलीमध्ये एकका रूपमा स्थापित भएको थियो।

उनको प्रशिक्षण अवधिमा क्लबले उल्लेखनीय सफलता हासिल गर्दै सन् २०१९–२० र २०२१–२२ सिजनमा लगातार लिग उपाधि जित्न सफल भएको थियो।

प्रवेशले भिन्सेन्जो अल्बर्टो एनीसको सहायकको रुपमा नेपाली राष्ट्रिय टोलीसँग पनि काम गरिसकेका छन्। त्यसैले उनी केही समय मच्छिन्द्रबाट टाढिएका थिए।

घरेलु फुटबलमा लामो अनुभव र सफलताको प्रमाणित इतिहास बोकेका प्रशिक्षक कटुवालको पुनरागमनले टोलीलाई थप मजबुत बनाउने क्लबको विश्वास छ। मच्छिन्द्रले उनको नेतृत्वमा आगामी सिजन प्रतिस्पर्धात्मक र आशाजनक हुने अपेक्षा गरेको छ।