सान्तोसमै बस्ने भए नेयमार

काठमाडौं। ब्राजिलियन फरवार्ड नेयमारले आफ्नो पुरानो क्लब सान्तोससँग सन् २०२६ को अन्त्यसम्मका लागि नयाँ सम्झौता गरेका छन्। ३३ वर्षीय स्ट्राइकरले अर्को समरमा हुने विश्वकप खेल्ने लक्ष्य राखेका छन्।

एक वर्षअघि सान्तोसमा फर्किएका नेयमार चोटका समस्यासँग जुध्नुपरे पनि क्लबलाई ब्राजिलको शीर्ष डिभिजनबाट रेलिगेसन हुनबाट जोगाउन महत्त्वपूर्ण भूमिका खेलेका थिए। उनको अघिल्लो सम्झौता जुलाईमा समाप्त हुँदै थियो।

यसलाई क्लबले मंगलबार राति औपचारिक रूपमा नवीकरण गरेको पुष्टि गरेको हो। बार्सिलोनाका पूर्वस्टार नेयमारले क्लबको विज्ञप्तिमा सन् २०२५ लाई आफ्नो विशेष र चुनौतीपूर्ण वर्ष भएको बताएका छन्।

नेयमारले सान्तोसका लागि पहिलो पटक २००९ देखि २०१३ सम्म खेलेका थिए। साउदी अरेबियाको क्लब अल–हिलाल छोडेपछि उनी गत जनवरीमा पुनः सान्तोस फर्किएका हुन्। सन् २०२५ मा उनले १२ गोल गर्नुका साथै ६ असिस्ट प्रदान गरेका छन्।

डिसेम्बरमा नेयमारको बायाँ घुँडाको सामान्य शल्यक्रिया गरिएको थियो। मे महिनामा नियुक्त ब्राजिलका प्रशिक्षक कार्लो एन्सेलोटीले अहिलेसम्म नेयमारलाई राष्ट्रिय टोलीमा छनोट गरेका छैनन्।