समिक्षा र पूजासम्मिलित टोलीले हान्यो २३ गोल !

काठमाडौं। बंगलादेश महिला फुटबल लिगमा आइतबार फेरि एकपक्षीय खेल देखियो।

नेपाली खेलाडीद्वय समिक्षा घिमिरे र पूजा रानासम्मिलित फराशगञ्ज स्पोर्टिङ क्लबले जमालपुर काचारिपाडा एकादशलाई पूर्ण रूपमा दबाबमा राख्दै २३–० गोलको ऐतिहासिक जित दर्ता गर्‍यो।

गोलको वर्षासँगै पहिलो हाफमा हातहालाहाल र दुई रातो कार्डका कारण खेल निकै घटनाबहुल बन्यो। कमलापुरस्थित वीरश्रेष्ठ सिपाही मुस्तफा कमाल स्टेडियममा सम्पन्न लिगको दशौं खेलमा फराशगञ्जकी शम्सुन्नहार जुनियर र कप्तान मारिया मान्दाले दोहोरो ह्याट्रिक पूरा गर्दै ६–६ गोल गरिन्।

राष्ट्रिय टोलीकी फरवार्ड तहुरा खातुनले पनि ह्याट्रिक गरिन्, जसमा आकर्षक ओभरहेड किक गोल विशेष चर्चा बन्यो शम्सुन्नहार सिनियरले दुई गोल गरिन् भने मोनिका चाक्मा, समिक्षा घिमिरे, अनामिका त्रिपुरा, मानुचिङ मार्मा, प्रीति र तृषाले समान एक–एक गोल थपे।

खेलको सुरुवातमै फराशगञ्जले आक्रामक प्रदर्शन गर्‍यो। किक–अफको मात्र ३८ सेकेन्डमै मोनिकाको गोलमार्फत अग्रता लिएको टोलीले पहिलो हाफमै ८–० को सहज अग्रता बनायो।

२१औं मिनेटमा दुवै टोलीका खेलाडीबीच हातहालाहाल भएपछि फराशगञ्जकी मोनिका र काचारिपाडाकी चाबेत्री त्रिपुराले रातो कार्ड पाएका थिए। लामो समय खेल रोकिए पनि पुनः सुरु भएपछि फराशगञ्ज अझ आक्रामक बन्यो।

दोस्रो हाफमा पनि गोलको धार रोकिएन। लगातार आक्रमणमा दवाबमा परेको काचारिपाडा एकादश खेलभरि नै निरीह देखियो। शम्सुन्नहार जुनियरले लगातार दुई खेलमा ह्याट्रिक पूरा गरिन् भने तहुराले ओभरहेड किकमार्फत आफ्नो ह्याट्रिक पूरा गरिन्।

यस जितसँगै महिला फुटबल लिगमा नयाँ कीर्तिमान कायम भयो। यसअघि सन् २०२१ मा बसुन्धरा किङ्सले २१–० को जित दर्ता गरेको थियो। त्यस कीर्तिमानलाई तोड्दै फराशगञ्जले २३–० गोलको विशाल जित हात पार्‍यो। काचारिपाडा एकादशका लागि यो हार लिग इतिहासकै सबैभन्दा लज्जास्पद नतिजामध्ये एक बन्यो।

अन्ततः फराशगञ्ज स्पोर्टिङ क्लब २३–० को अविश्वसनीय जितसहित मैदानबाट बाहिरियो।