सचिनले समानुपातिक निर्वाचन सूचीबाट नाम फिर्ता लिए

काठमाडौं। एफसी चितवनका मालिक सचिन ढकालले समानुपातिक निर्वाचन प्रणालीअन्तर्गत राष्ट्रिय स्वतन्त्र पार्टी (रास्वपा)को सूचीबाट आफ्नो नाम फिर्ता लिने निर्णय गरेका छन्।

रास्वपाले खस आर्य क्लस्टरबाट दोस्रो नम्बरमा ढकालको नाम प्रस्ताव गरेको थियो। तर, एक विज्ञप्ति जारी गर्दै ढकालले आइतबार नेपाली अर्थतन्त्र, खेलकुद, पर्यटन तथा युवा रोजगारी सिर्जनाका क्षेत्रमा आफू सक्रिय रहँदै आएको उल्लेख गरेका छन्। हाल वार्षिक पाँच लाखभन्दा बढी नेपाली युवा रोजगारीका लागि विदेशिने यथार्थ प्रस्तुत गर्दै उनले स्वदेशमै केही गर्ने सोच र आँटसहित फर्किने युवाहरूको प्रयासमा साथ र सहयोग गर्ने प्रतिबद्धता व्यक्त गरेका छन्।

उद्यमशीलता विकासका लागि आफू प्रेरित हुनुमा आफ्ना पिता चन्द्रप्रसाद ढकालको भूमिका महत्त्वपूर्ण रहेको उल्लेख गर्दै उनले स्वदेशमै उद्यम गरी रोजगारी सिर्जना गर्नुपर्ने धारणा व्यक्त गरेका छन्। सुशासनसहितको समुन्नत नेपाल निर्माणका लागि नवीन सोच, ऊर्जा र प्रतिबद्धतासहित नवयुवाहरूको सामूहिक प्रयास आवश्यक रहेको उनको भनाइ छ।

उद्यमशीलताको प्रवर्द्धनमार्फत सामाजिक रूपान्तरण र मुलुकको विकास आवश्यक रहेको वर्तमान परिवेशमा आफूलाई समानुपातिक निर्वाचन सूचीमा समावेश गरिएकोमा पार्टी नेतृत्वप्रति आभार व्यक्त गर्दै ढकालले संविधानले व्यवस्था गरेको समानुपातिक निर्वाचन प्रणालीको मर्म र मान्यताको सम्मानस्वरूप यसपटक व्यक्तिगत कारणले सूचीबाट नाम फिर्ता लिने निर्णय गरेको जानकारी गराएका छन्।

युवाहरूको सामूहिक नेतृत्वमा सुशासनसहितको समुन्नत नेपाल निर्माण गर्ने अभियानप्रति निरन्तर प्रतिबद्ध रहने उल्लेख गर्दै उनले आगामी दिनमा राष्ट्र र समाजको हितमा राजनीतिक जिम्मेवारी आवश्यक परेमा सधैँ तत्पर रहने प्रतिबद्धता पनि जनाएका छन्।