फेरि समस्यामा नेपाल

विश्वास थापा, शारजाह (युएई)। क्रिजमा जमिरहेका कप्तान रोहितकुमार पौडेल र कुशल मल्ल क्याच भएसँगै वेस्ट इन्डिजविरुद्धको ऐतिहासिक टी-२० आई सिरिज खेलिरहेको नेपाल फेरि समस्या परेको छ।

शारजाह क्रिकेट अन्तर्राष्ट्रिय रंगशालामा टेस्ट राष्ट्र वेस्ट इन्डिजका कप्तान अकिल हुसेनले टस जितेर पहिला नेपाललाई ब्याटिङको निम्तो दिएका थिए। तर, नेपालले पहिलो पावर प्लेमा राम्रो सुरुआत गर्न सकेन। नेपालले दुई विकेट गुमाउँदै जम्मा ३५ रन बनायो।

ओपनर कुशल भुर्तेल तेस्रो ओभरको पहिलो बलमै क्याच बिहाइन्ड द विकेट भए। ११ बलमा एक चौकासहित ६ रन बनाएका उनी हुसेनको बलमा अमिर जाङ्गोबाट क्याच भएका हुन्।

लगत्तै अर्का ओपनर आसिफ पनि क्याच भए। चार बलमा तीन रन बनाएका उनी जोसन होल्डरको बलमा ओबेड म्याकोयबाट क्याच भएका हुन्।

त्यसपछि कुशल र रोहितले तेस्रो विकेटका लागि ५८ रनको साझेदारी गर्दै नेपालको इनिङ्स उकासेका थिए। तर, यी दुवैलाई नवीन बिदाइसीले पभिलियन फर्काए। २१ बलमा समान दुई चौका र दुई छक्का प्रहार गर्दै कुशलले ३० रन बनाए।

तर, ११औं ओभरको चौथो बलमा उनी होल्डरबाट क्याच भए। त्यसको दुई ओभरपछि नै रोहित पनि क्याच भए। नवीन बिदाइसीको बलमा उनी एकिम अगस्टेबाट ३८ रनमा ब्याच भएका हुन्। रोहितले ३५ बलमा तीन चौका र एक छक्का प्रहार गरे।