नेपाली टोलीमा पुरानै रोगको समस्या

काठमाडौं। इतिहासले पनि प्रमाणित गरिसकेको थियो– नेपालभन्दा बंगलादेश निकै बलियो छ।

तर, थिम्पुस्थित चाङ्लिमिथाङ रंगशालामा आइतबार सम्पन्न साफ यु–१७ महिला च्याम्पियनसिपमा खेलमा त्यो बलियो टोलीसँग नेपालले जुन तरिकाले ४० मिनेटसम्म खेलेको थियो त्यसले इतिहास पल्टाउने संकेत देखाइसकेको थियो। यद्यपि, नेपाली टोली फेरि पुरानै कमजोरीको जालमा फस्यो। गोल खाएलगत्तै आत्मबल गुमाउन पुग्यो।

साबिक विजेता बंगलादेशले ३–० को जित हात पार्दा नेपालको खेलक्रम फेरि पनि मानसिक स्थिरतामा नटिकेको प्रमाणित भयो। यो हारले नेपाललाई अंक तालिकामा मात्र होइन, मानसिक र रणनीतिक रूपमा पनि कमजोर बनाउन बनाइदिएको छ।

डबल राउन्ड रोबिनको आधारमा भइरहेको प्रतियोगितामा नेपालका लागि यो तीन खेलमा दोस्रो हार हो। योसँगै ९ अंकसहित शीर्ष स्थानमा रहेको भारत र उसलाई ६ अंकसहित पछ्याइरहेको बंगलादेश उपाधिको दाबेदारीमा रहने पक्का भएको छ।

तर, पहिलो खेलमा भारतसँग ८–० ले पराजित हुँदै देखिनै शतप्रतिशत जित निकालेर च्याम्पियन बन्ने लक्ष्य बनाएको नेपाल भने यसपल्ट तेस्रो स्थानमा रहन भुटानसँग प्रतिस्पर्धा गर्ने भएको छ।  

नेपाली टोलीका मुख्य प्रशिक्षक चेतनारायण श्रेष्ठ यस्तो खराब नतिजाको मुख्य कारण टोलीको मानसिक कमजोरी भएको स्वीकार्छन्।

खेलपछि उनले भने, ‘नेपाली फुटबलमा लामो समयदेखि देखिँदै आएको समस्या भनेकै गोल खानासाथ आत्मबल गुमाउनु हो। बंगलादेशविरुद्ध पनि नानीहरू अनावश्यक रूपमा आत्तिए।’

खेलमा थुनुए मार्माले ४१औं मिनेटमा बंगलादेशको पहिलो गोल गरिन्। त्यसपछि सौरभी प्रीतिले ४५औं मिनेटमा दोस्रो गोल थपिन्।

दोस्रो हाफको इन्ज्युरी समयमा रेयाले तेस्रो गोल गर्दै बंगलादेशलाई जित मात्रै सुनिश्चित गराइनन् उपाधि होडमा पुनरागमन समेत गराइन्। नेपालले खेल अवधिभर केही अवसर सिर्जना गरेको भए पनि ती निर्णायक सावित भएनन्।

५५औं मिनेटमा सहारा लिम्बूको प्रहार सीधै पोस्टमा ठोक्कियो। केही मिनेटपछि उनले ‘वान भर्सेस वान’को अवसरसमेत खेर फालिन्। दिकी स्याङ्बो लामाले दिएको थ्रु पास उत्कृष्ट भए पनि अन्तिम टच भारी साबित भयो। ती दुई क्षणमा खेलको कथा अर्कै बन्न सक्थ्यो।

श्रेष्ठ पनि स्वीकार गर्छन्,‘दोस्रो हाफमा हाम्रै केही राम्रा अवसर थिए, तर तिनलाई गोलमा परिणत गर्न सकेनौं।’

अर्को खेल बुधबार नेपाल र बंगलादेशबीच हुनेछ। यदि नेपालले सकारात्मक परिणाम निकाल्न सकेन भने उपाधि समीकरणबाट बाहिरिनु पर्नेछ। अहिलेको अवस्था पनि लगभग बाहिरिसकेको छ।

त्यसैले भारत र भुटानबीचको खेल पनि निर्णायक सावित हुनेछ। डबल राउन्ड रोबिन प्रणाली अनुसार समूह चरणका खेल सकिएपछि शीर्ष स्थानमा रहने टोली नै च्याम्पियन हुनेछ।

नेपालका लागि अब चुनौती स्पष्ट छ। मानसिक स्थिरता कायम राख्दै गोलमा परिणत गर्ने क्षमतामा सुधार्नु र रणनीति अनुसार खेल खेल्नुपर्नेछ।