छनोट पारदर्शी रहेको टेनिस संघको स्पष्टीकरण

काठमाडौं। नेपाल टेनिस संघले डेभिस कपको छनोट प्रकृया निष्पक्ष र पारदर्शी रहेको स्पष्टीकरण दिएको छ ।

खेलाडी अभिषेक बास्तोलाको विषयमा उठेका प्रश्नको जवाफ दिदै संघले निष्पक्षता, पारदर्शीता र प्रर्दशनका आधारमा डेभिस कपमा नेपाली टिम छनोट गरिएको दाबी गरेको हो । 

सन् २०२४ को आईटीएफको शीर्ष २ हजारभित्र रहेकाले बास्तोला र नेपाल नम्बर एक प्रदीप खड्कालाई टिममा समावेश गरिएको उल्लेख गर्दै संघले सन् २०२५ मा अभिषेकले पर्याप्त आईटीएफमा प्रतिस्पर्धा नगरेकाले उनको वरियता घटेको र प्रत्यक्ष समावेशको मापदण्डमा नपरेको प्रष्टिकरण दिएको छ ।  

त्यसपछि अभिषेकलाई वाइल्ड कार्डबाट छनोट खेलमा सहभागी हुने अवसर दिएपनि उनले गुआममा आयोजना आईटीएफको प्रो प्रतियोगितामा सहभागी हुने निर्णय गरेको संघको दाबी छ । 

‘संघले २०२५ अप्रिल २६ मा छनोट खेलको मिति सार्वजनीक गरिसकेको थियो र आईटीएफले तोकेको अन्तिम मनोनयन समयसीमा भएका कारण मिति परिवर्तन सम्भव थिएन ।’ टेनिस संघले बिज्ञप्तिमार्फत भनेको छ, ‘एक जना खेलाडीको व्यक्तिगत तालिकाका कारण अन्य सबै खेलाडीलाई असर पार्ने गरी मिति परिवर्तन गर्नु न्यायोचित हुने थिएन ।’ 

‘अभिषेक बास्तोलाले यो निर्णयबाट असन्तुष्ट हुनु स्वभाविक भएपनि नेपाल टेनिस संघले स्थापित नियमअनुसार पारदर्शी ढंगले निर्णय गरेको थियो । जुन हामी दृढतापूर्वक दोहोर्याउँछौं ।’ संघले भनेको छ । 

अभिषेकले संघविरुद्ध सामाजिक सञ्जालमा गतल आरोप लगाउने बाटो रोजेको उल्लेख गर्दै संघले आफुहरु सधै निष्पक्ष, पारदर्शी र योग्यता आधारित चयन प्रक्रिया अपनाउने प्रतिबद्धता सहित अगाडि बढ्ने बताएको छ । 

वर्तमान नेपाली टेनिसका सर्वोत्कृष्ट खेलाडी मानिएका अभिषेक बास्तोलाले डेभिस कपमा योग्यतामा आधारित नभएर पक्षपात रुपमा खेलाडी छनोट गरिएको भन्दै असन्तुष्टि जनाएका थिए । सोही विषयमा संघले प्रेस विज्ञप्तिमार्फत घटनाको प्रष्टिकरण दिएको हो ।