जयस्नु र अर्नवलाई स्वर्ण

काठमाडौं। कीर्तिपुरका जयस्नु महर्जन र काठमाडौं महानगरपालिका २६ का अर्नव श्रेष्ठले काठमाडौं जिल्लाव्यापी वृहत खेलकुदअन्तर्गत टेबलटेनिसमा सोमबार स्वर्ण जितेका छन् । ब्वाइज सिंगल्सको यु–१६ मा जयस्नु र यु–१४ मा अर्नव पहिलो भएका हुन् ।

लैनचौरस्थित राष्ट्रिय टेबलटेनिस प्रशिक्षण केन्द्रमा भएको यु–१६ फाइनलमा जयस्नुले काठमाडौं महानगरपालिका २ का उज्ज्वल मानन्धरलाई ६–११, ११–४, ११–४ र ११–८ को सेटमा पराजित गरे । कीर्तिपुरका सफल महर्जन र काठमाडौं महानगरपालिका २६ का आर्यन शाहीले कांस्य जिते ।

यु–१४ फाइनलमा अर्नवले काठमाडौं महानगरपालिका १ का निश्चल थापालाई ११–२, ९–११, ११–७, ५–११ र १२–१० को सेटमा हराए । काठमाडौं महानगरपालिका १७ का निरभ महर्जन तथा काठमाडौं महानगरपालिका २६ का शम्भुराज वन्त तेस्रो भए ।

काठमाडौं महानगरपालिका वडा २६ को आयोजनामा भएको प्रतियोगिताको भेट्रान ४० वर्षमाथि पुरुष सिंगल्समा काठमाडौं महानगरपालिका २ का उमेश मानन्धर पहिलो भए । उनले फाइनलमा काठमाडौं महानगरपालिका २६ का चन्दन शाहीलाई १३–११, ९–११, १२–१० र ११–७ ले पाखा लगाए । कीर्तिपुरकाद्वय सुधिर महर्जन र जयराम महर्जन तेस्रो बने । प्रतियोगितामा काठमाडौं महानगरपालिका २५ का रियान्श श्रेष्ठ उत्कृष्ट खेलाडी घोषित भए ।