काठमाडौं। नटिंघम फरेस्टले म्यानचेस्टर युनाइटेडलाई १–० ले हराउँदै च्याम्पियन्स लिग सम्भावना बलियो बनाएको छ।
युनाइटेडका पूर्वविंगर एन्टोनी एलांगाले आफ्नो पूर्वक्लबलाई नराम्रो क्षण दिलाउँदै खेल सुरु भएको पाँच मिनेटमै उत्कृष्ट एकल गोल गरे। उनले आफ्नो टोली नुनो एस्पिरिटो सान्तोको नेतृत्वमा तीन महत्त्वपूर्ण अंक दिलाए।
तेस्रो स्थानमा रहेको फरेस्टले छैटौं स्थानको न्युकासलसँगको दूरी १० अंकले बढाएको छ। यस सिजन युरोपेली प्रतियोगितामा इङ्ग्लिस क्लबहरूको उत्कृष्ट प्रदर्शनका कारण शीर्ष पाँच स्थान हासिल गर्ने टोलीहरूले च्याम्पियन्स लिगमा स्थान सुरक्षित गर्ने सम्भावना लगभग निश्चित छ।
दुईपल्ट युरोपेली च्याम्पियन बनेको फरेस्टले सन् १९८० पछि पहिलोपल्ट च्याम्पियन्स लिग खेल्ने लक्ष्य राखेको छ। एलांगालाई युनाइटेडले सन् २०२३ मा छोडेको थियो। तर, फरेस्टमा आएपछि उनले आफ्नो उत्कृष्ट क्षमता देखाउँदै आएका छन्।
स्विडिस अन्तर्राष्ट्रिय खेलाडीले आफ्नो हाफबाट नै बल लिँदै जबरदस्त गति देखाउँदै युनाइटेडको बक्सभित्र छिर्दै गोलरक्षक आन्द्रे ओनानालाई बिट गरे। ‘उनी विशेष खेलाडी हुन् र टिमलाई गति प्रदान गर्छन्। उनले यो एक्लै गरे र हामी खुसी छौं,’ फरेस्टका प्रशिक्षक नुनो एस्पिरिटो सान्तोले भने।
गत सिजन रेलिगेसनबाट जोगिन संघर्षरत फरेस्ट अहिले सानदार सिजन बिताउँदै एफए कपको सेमिफाइनलसम्म पुगेको छ। शनिबारको एफए कप क्वार्टरफाइनलमा ब्राइटनलाई १२० मिनेटसम्म खेलेर पेनाल्टी सुटआउटमा हराएपछि थकित देखिएको फरेस्ट बुधबार आफ्ना मुख्य स्ट्राइकर क्रिस वुडबिना मैदान उत्रिएको थियो।
फरेस्ट दोस्रो हाफमा केही सुस्त देखिए पनि युनाइटेडको आक्रमण प्रभावहीन रह्यो। ‘यो सिजन यस्तै छ। हामीले धेरै अवसर सिर्जना गर्यौं, विपक्षीलाई दबाबमा राख्यौं। तर, फाइनल थर्डमा आवश्यक स्तरको खेल देखाउन सकेनौं,’ युनाइटेडका प्रशिक्षक रुबेन अमोरिमले भने।
उनले थपे,‘हामीले यो खेल जित्नुपर्थ्यो, ड्र गर्नु पनि स्वीकार्य हुँदैनथ्यो। तर, अन्त्यमा हामीले तीन अंक गुमायौं।’
अमोरिमले अन्तिम समयमा डिफेन्डर ह्यारी म्याग्वायरलाई स्ट्राइकरको रूपमा अगाडि पठाए। उनले स्टपेज समयमा गोलको प्रयास गरे। तर, मुरिलोले बल लाइनबाट क्लियर गरे। यो हारपछि युनाइटेड १३औं स्थानमा खस्किएको छ। सिजनभर लगातार दुई प्रिमियर लिग जित हासिल गर्न असफल भएको छ।
