काठमाडौं। रियल मड्रिड कोपा डेल रेमा पुन: घरेलु मैदानमै रियल सोसिडाडसँग पराजित हुने खतरामा थियो। तर, थप समयमा निर्णायक गोल गर्दै रियल तीन सिजनमा दोस्रो पटक फाइनलमा प्रवेश गर्न भयो।
अन्तोनियो रुडिगरले थप समयको ११५औं मिनेटमा निर्णायक गोल गर्दै स्यान्टियागो बर्नाबेउमा रियललाई ५–४ को समग्र जित दिलाएका हुन्।
पाँच वर्षअघि सोसिडाडले बर्नाबेउमा ४–३ को ऐतिहासिक जित निकालेको थियो। जसले बास्क क्लबलाई त्यस सिजनको उपाधि जित्ने मार्ग तयार गरिदिएको थियो।
‘सोसिडाडले निकै राम्रो खेल्यो, उनीहरूसँग खेल्न सधैं कठिन हुन्छ। तर, यो रियल मड्रिड हो, हामी अन्तिम क्षणसम्म लड्छौं। हामी अर्को फाइनलमा पुगेका छौं र जित्नेछौं,’ रुडिगरले भने।
अप्रिल २६ मा सेभिलमा हुने फाइनलमा रियलले बार्सिलोना वा एट्लेटिको मड्रिडमध्ये कुनै एकसँग खेल्नेछ। यी दुई टोली बुधबार एट्लेटिकोको मेट्रोपोलिटानो रंगशालामा दोस्रो लेग खेल्दैछन्। पहिलो लेगमा बार्सिलोनामा ४–४ को बराबरी भएको थियो।
रियलले गत सिजन ओसासुनालाई पराजित गर्दै आफ्नो २०औं कोपा उपाधि जितेको थियो। सोसिडाडले भने सन् २०२० मा एथ्लेटिक बिल्बाओलाई हराउँदै तेस्रोपल्ट उपाधि जितेको थियो।
कार्लो एन्सेलोट्टीको टोलीले पहिलो लेग १–० ले जितेको थियो। तर, दोस्रो लेगमा सोसिडाडले ४–३ को जित निकाल्यो। खेलको इन्जुरी समयमा मिकेल ओयारजाबालले गोल गरेपछि कुल स्कोर बराबरी हुँदै अतिरिक्त समयमा पुग्यो।
रुडिगरले ११५औं मिनेटमा अरदा गुलेरको कर्नर किकमा हेडर गोल गर्दै रियललाई जित दिलाए। पहिलो गोल सोसिडाडका आनदर बारेनेट्सियाले १६औं मिनेटमा गरे। त्यसपछि ३०औं मिनेटमा एन्ड्रिकले सुन्दर फ्लिक गोल गर्दै बराबरी गरे।
७२औं मिनेटमा रियलका डेविड अलाबाको आत्मघाती गोलले सोसिडाडलाई फेरि अग्रता दिलायो। ८०औं मिनेटमा ओयारजाबालले गोल गर्दै अग्रता ३–१ बनाए।
तर, रियलले ८२औं मिनेटमा जुड बेलिङ्घम र ८६औं मिनेटमा ओरलियन चुआमेनीका गोलसहित खेल बराबरी गर्यो। खेल समाप्त हुन केही मिनेट मात्र बाँकी रहँदा ओयारजाबालले स्टपेज टाइममा हेडर गोल गर्दै खेललाई अतिरिक्त समयतर्फ धकेलिदिए। तर, अन्ततः रुडिगरको गोलले रियललाई ५–४ को कुल स्कोरमा फाइनलमा पुर्यायो।
