बुटवल। रुपन्देहीकै पुरानो र प्रतिष्ठित तिलोत्तमा गोल्डकपको उद्घाटन खेलमा आयोजक करेन्ट रुपन्देही–११ र विभागीय टोली एपिएफ भिड्दैछन्।
खेल देविनगरस्थित एन्फा टेक्निकल खेलमैदानमा दिउँसो ३ बजे हुनेछ। उक्त खेलको प्रत्यक्ष प्रसारण खेलपाटीको युट्युब तथा फेसबुक पेजबाट हुनेछ।
चैत ९ गतेबाट १६ गतेसम्म सञ्चालन हुने यो संस्करणमा आयोजक करेन्ट रुपन्देही–११ सहित संकटा एफसी, मच्छिन्द्र एफसी, चर्च ब्याइज युनाइटेड, नेपाल पुलिस क्लब, एपिएफ क्लब तथा दुई विदेशी टिम एडोर्न गडवाल स्पोर्टिङ क्लब, जर्जियन एफसी गरी आठ टिमको प्रतिस्पर्धा गर्नेछन्।
यो वर्ष पुरस्कार राशिमा समेत अघिल्लो संस्करणभन्दा एक लाख रुपैयाँ वृद्धि गरिएको छ। उपाधि विजेता टिमले नगद १२ लाख १२ हजार २२२ रुपैयाँ प्राप्त गर्नेछन्।
यसै गरी उपविजेता टिमले ६ लाख, ६६ हजार ६६६ रुपैयाँ तथा विधागत उत्कृष्ट खेलाडीहरूलाई गोलरक्षक, डिफेन्डर, मिडफिल्डर, फरवार्ड, कोचलाई नगद ३१ हजार र कप तथा सर्वोत्कृष्ट खेलाडीलाई स्कुटर वा मोटरसाइकल उपहार तथा प्रत्येक दिनको म्यान अफ द म्याचलाई नगद ११ हजार १११ रुपैयाँबाट पुरस्कृत गरिने छ।
