काठमाडौं। म्यानचेस्टर सिटीविरुद्ध २–१ को जित निकाल्दै चेल्सीले शनिबार यो सिजनको पहिलो उपाधि जितेको छ। वुमेन्स लिग कप फाइनल जित्दै चेल्सीले क्वाड्रुपल (एकै सिजन चार) उपाधि जित्ने लक्ष्य जीवित रहेको छ।
चेल्सी हालसम्म सबै प्रतियोगितामा अपराजित छ। क्लबले वुमेन्स सुपर लिगमा आठ अंकको अग्रता लिएको छ, जसमा उपाधि रक्षा गर्न अझै ६ खेल बाँकी छ। साथै टिम च्याम्पियन्स लिगको क्वार्टरफाइनलमा पुगेको छ र एफए कपको सेमिफाइनलमा छ।
७७औं मिनेटमा युई हासेगावाको आत्मघाती गोलले चेल्सीलाई जित दिलायो। खेलको आठौं मिनेटमा मायरा रामिरेजले सुरूआती अग्रता दिलाएकी थिइन्। कोलम्बियाली स्ट्राइकर रामिरेजकै राइट–विङबाट आएको क्रसलाई हासेगावाले गल्तीले आफ्नै पोस्टमा पठाएकी थिइन्।
जापानी मिडफिल्डर हासेगावा खेलपछि भावुक देखिइन्। उनलाई टोलीका सहकर्मीले सान्त्वना दिए। ६४औं मिनेटमा मनमोहन गोल गर्दै आओबा फुजिनोले सिटीका लागि बराबरी गोल फर्काएकी थिइन्।
चेल्सीले यसअघि लगातार तीन वुमेन्स लिग कपको फाइनल हारेको थियो। ‘यो कुरा धेरै समय मेरो दिमागमा खेलिरहेको थियो,’ चेल्सी कप्तान मिल्ली ब्राइटले भनिन्, ‘दोस्रो हाफमा सिटीका निरन्तर आक्रमण रोक्न उनले महत्त्वपूर्ण भूमिका खेलेकी थिइन्।’
उनले थपिन्, ‘हामी कहिल्यै हार नमान्ने मानसिकता राख्छौं। यो चेल्सीको डिएनएमै छ।’
१२ दिनभित्र चार खेल
यो चेल्सी र सिटीबीचको चार भिडन्तमध्ये पहिलो थियो। दुवै टोली च्याम्पियन्स लिगको दुई लेगको क्वार्टरफाइनलमा भिड्दैछन्, जसको पहिलो लेग बुधबार हुनेछ। यी दुई टिमबीच वुमेन्स सुपर लिगको खेल पनि हुनेछ।
चेल्सीका प्रशिक्षक सोनिया बोम्पास्तोरले खेलपछि भनिन्, ‘हाम्रा खेलाडीहरूलाई नियम राम्रोसँग थाहा छ। जित मनाउनु महत्त्वपूर्ण छ, तर बुधबार फेरि सिटीविरुद्ध खेल्नुपर्छ। त्यसैले हामी तयार हुनुपर्छ।’
उनले हाँस्दै थपिन्,‘खेलाडीहरू बेलुका ९ बजेसम्म बाहिर जान सक्छन्, ९:३० मा ओछ्यानमा हुनुपर्छ!’
