हाइड एन्ड सिक किन्डर गार्टेनद्वारा आङबाबु सम्मानित

काठमाडौं। हाइड एन्ड सिक किन्डर गार्टेनले ११औं दक्षिण एसियाली खेलकुद (साग) का स्वर्णविजेता उसुका आङबाबु लामालाई सम्मान गरेको छ ।

वनस्थलीको ढुंगेधारास्थित किन्डर गार्टेनले शुक्रबार आफ्नो १२औं वार्षिकोत्सवका अवसरमा सागका स्वर्णविजेता उसुका पूर्वखेलाडी तथा प्रशिक्षक आङबाबुलाई सम्मान गरेको हो । किन्डर गार्टेनकी निर्देशक इन्दिरा गौतम र संस्थापक प्रिन्सिपल कुमुद भट्टले  सागका स्वर्णविजेता आङबाबुलाई सम्मान गरेका हुन् । किन्डर गार्टेनका खेलकुद प्रशिक्षक लामाले नेपाली खेलकुदमा उसु खेलबाट निरन्तर योगदान पु¥याउँदै आएकाले पूर्वखेलाडी आङबाबुलाई सम्मान गरेको बताए । किन्डर गार्डेनले प्रत्येक वर्ष राष्ट्रिय तथा अन्तर्राष्ट्रियस्तरमा नाम चलेका एक जना खेलाडीलाई सम्मान गर्ने गरेको पनि विद्यालयका खेलकुद प्रशिक्षक लामाले जानकारी दिए ।

आङबाबुले सन् २०१० मा बाङ्लादेशको ढाकामा सम्पन्न ११औं सागमा नेपाललाई उसुको थाउलो विधामा स्वर्ण पदक दिलाएका हुन् । उनले सन् २००८ मा बाङ्लादेशकै ढाकामा सम्पन्न तेस्रो दक्षिण एसियाली उसु च्याम्पियनसिपमा पनि समान एक स्वर्ण र रजत पदक जितेका थिए । त्यसबाहेक उनले सन् २००७ मा नै चीनको बेइजिङमा भएको नवौं विश्व उसु च्याम्पियनसिप, २०१० मा चीनको ग्वाङ्झाउमा भएको १६औं एसियाली खेलकुद र टर्कीमा सन् २०११ मा सम्पन्न ११औं विश्व उसु च्याम्पियनसिपमा पनि प्रतिस्पर्धा गरेका थिए ।

किन्डरका कराते, फुटबल र पौडीका प्रशिक्षक लामाले लामो समय नेपाली खेलकुदमा खेलाडीका रूपमा राष्ट्रलाई चिनाउँदै पछिल्लो समय प्रशिक्षणमा योगदान दिएकाले आङबाबुको कामको मूल्याङ्कनसहित सम्मान गरिएको बताए ।