काठमाडौं । राष्ट्रिय खेलकुद परिषद्का उपाध्यक्ष पिताम्बर तिम्सिनाले संघहरुको विवाद मिलाएर अघि बढ्ने बताएका छन् । नेपाल भलिबल संघले शुक्रबार काठमाडौंमा आयोजना गरेको सम्मान कार्यक्रममा उपाध्यक्ष तिम्सिनाले मिल्न नचाहने संघप्रति कडा कदम चाल्दै अघि बढ्ने संकेत गरेका हुन् ।
‘संघहरुको विवाद अन्त्य गर्दै लैजान्छौ । सहकार्य चाहे मिलाएर लान्छौ, नत्र मिल्काएर जान्छौ ।’ उनले भने ।
संघहरुको विवादका कारण समाजका राम्रा व्यक्ति खेलकुदमा आउन नसकेको जिकिर गर्दै उनले एकै प्रकृतिका तीन वटा संघ परिषद्मा दर्ता हुनु दुखद बिषय भएको बताए ।
राष्ट्रिय खेलकुद परिषद् घिट घिट अवस्थामा रहेको जिकिर गर्दै उनले समास्या समाधानका लागि सिंगो राखेपको टिम अगाडी बढेको उल्लेख गरे ।
संघहरुको विवादका कारण नेपाली खेलकुद अघि बढ्न नसकेको निष्कर्श निकाल्दै सरकारले तिम्सिनाको नेतृत्वमा विवाद समाधान तथा सहजीकरण समिति गठन गरेको छ । समितिले यसै हप्ता मात्र नेपाल जिम्न्याष्टिक संघको पुर्नगठन गर्दै तदर्थ कमिटि गठन गरेको थियो ।
यस्तै, कुस्ती, तेक्वान्दो, कराँते लगायतका संघमा देखिएको विवाद समाधानमा समेत समितिले काम गरिरहेको छ ।
‘खेलुकद बुझेको प्रधानमन्त्री देशमा हुनुहुन्छ । त्यही लाईनको मन्त्री हुनुहुन्छ । त्यही पाटीको कार्यकर्ता म उपाध्यक्ष छु, त्यही पाटीको सदस्य सचिव हुनुहुन्छ ।’ उनले थपे, ‘अब पनि हुदैन, गर्दिन भन्ने छुट छैन । अहिले नगरे कहिले गर्ने ? हामी हाम्रो होईन राम्रो मान्छेको खोजीमा छौ ।’
